Trajneri i Real Madridit, José Mourinho, ka konfirmuar se klubi ka nisur një procedurë disiplinore ndaj Raul Asencios, mbrojtësit spanjoll që është përfshirë në disa çështje gjyqësore dhe episode jashtë fushës.
23-vjeçari, i formuar në akademinë e Real Madridit, u dënua të mërkurën me një gjobë prej 14,400 eurosh, si dhe me pezullimin e lejes së drejtimit për tetë muaj, pasi u shpall fajtor për drejtim automjeti në gjendje të dehur.
Ndërkohë, këtë të enjte në Gran Canaria pritet të nisë edhe procesi gjyqësor për një tjetër çështje, në të cilën Asencio është i përfshirë së bashku me tre ish-shokë të tij të skuadrës nga akademia e Real Madridit.
Futbollisti akuzohet se në vitin 2023 kishte shpërndarë një regjistrim me përmbajtje seksuale, ku përfshiheshin dy vajza të moshës 16 dhe 18 vjeç. Sipas raportimeve të mediave spanjolle, Asencio pritet të lirohet nga akuzat pasi u ka kërkuar falje dy vajzave të përfshira në çështje.
Në konferencën për shtyp, Mourinho konfirmoi se Real Madridi ka hapur një procedurë disiplinore ndaj mbrojtësit.
“Ai është një profesionist shembullor. Kur ishte në gjendje të mirë fizike, askush nuk stërvitej aq fort sa ai. Edhe tani që është i dëmtuar prej disa javësh, është i pari që mbërrin dhe i fundit që largohet”, tha Mourinho, duke vlerësuar sjelljen e lojtarit në stërvitje.
Megjithatë, trajneri theksoi se fanella e Real Madridit sjell me vete një përgjegjësi që shkon përtej fushës së futbollit.
“Një lojtar i Real Madridit është i tillë 24 orë në ditë, shtatë ditë në javë, 12 muaj në vit. Gjithçka që bën jashtë fushës përfaqëson Real Madridin dhe mund të dëmtojë prestigjin e klubit”, deklaroi ai.
