Policia ka nisur hetimet për të zbardhur rrethanat e vdekjes së 37-vjeçares shtatzënë, Marjana Karolina Bunaj, e cila ndërroi jetë gjatë transportimit nga Pogradeci drejt Tiranës.
Në kuadër të hetimeve, autoritetet kanë sekuestruar dhe administruar kartelën mjekësore të pacientes, ndërsa janë marrë në pyetje pjesëtarë të stafit mjekësor dhe familjarë të saj. Deklarimet dhe dokumentacioni pritet të ndihmojnë në verifikimin e mënyrës së trajtimit të 37-vjeçares dhe kohës kur është vendosur transferimi i saj drejt kryeqytetit.
Motra e viktimës, e cila e ka shoqëruar gjatë qëndrimit në maternitet, ka ngritur pretendime për një vonesë në nisjen e pacientes drejt Tiranës. Ajo kërkon që ngjarja të hetohet në mënyrë të plotë dhe të përcaktohen përgjegjësitë, nëse rezulton se ka pasur neglizhencë në trajtimin e saj.
Sipas të dhënave paraprake, 37-vjeçarja dyshohet se ka pësuar një hemorragji të brendshme, e cila nuk mendohet të ketë pasur lidhje të drejtpërdrejtë me shtatzëninë.
Për të përcaktuar me saktësi shkakun e vdekjes do të kryhet autopsia mjeko-ligjore. Ekspertiza pritet të jetë vendimtare për hetimin, pasi do të ndihmojë në përcaktimin e shkakut të vdekjes dhe nëse mënyra apo koha e trajtimit të pacientes ka ndikuar në përkeqësimin e gjendjes së saj.
