Kryeministri dhe kreu i PS-së, Edi Rama, do të zhvillojë sot në orën 11:00 një takim me deputetët e qarkut Tiranë dhe të deleguarit politikë të PS-së. Mbledhja zhvillohet një ditë pas takimit që Rama zhvilloi me drejtuesit politikë të qarqeve dhe ministrat, ku në qendër të diskutimeve ishte zbatimi i dokumenteve “Besa” dhe “Prania Besnike”.
Gjatë takimit të djeshëm, kryesocialisti u ka kërkuar drejtuesve politikë që të rrisin praninë në terren dhe të jenë më pranë qytetarëve në zonat ku janë angazhuar. Në bashkëpunim me strukturat e PS-së, deputetët dhe kryetarët e bashkive, ata pritet të ndërtojnë një kalendar takimesh me banorët.
Qëllimi është evidentimi i problematikave dhe shqetësimeve të qytetarëve, duke nisur nga çështjet individuale deri te problemet që prekin komunitetet, si infrastruktura rrugore, menaxhimi i mbetjeve dhe investimet publike.
Problematikat e evidentuara gjatë takimeve në terren do t’u përcillen institucioneve dhe ministrive përkatëse. Për ndjekjen e tyre deri në zgjidhje pritet të angazhohet një zëvendësministër, i cili do të ketë përgjegjësinë për të monitoruar ecurinë institucionale të kërkesave të qytetarëve.