Tre fëmijë, të moshave 9 deri në 17 vjeç, dhe dy gra, Hajrije Taushani dhe Myrvete Dibra, janë riatdhesuar nga Siria dhe kanë mbërritur në Tiranë pas një operacioni të koordinuar nga autoritetet shqiptare. Zv/ministrja e Europës dhe Punëve të Jashtme, Megi Fino, e cilësoi operacionin të ndërlikuar, duke theksuar se institucionet kanë pasur komunikim të vazhdueshëm me familjarët.
“Ka qenë një angazhim i madh sepse janë operacione të ndërlikuara”. Pas mbërritjes në Shqipëri, të riatdhesuarit iu nënshtruan kontrolleve mjekësore dhe vlerësimeve psiko-sociale. Fino tha se vëmendje e veçantë i është kushtuar fëmijëve.
“Jemi shumë të kujdesshëm përderisa kemi të mitur”. Sipas saj, bëhet fjalë për riatdhesime vullnetare dhe ky ishte operacioni i gjashtë i suksesshëm. “Janë zhvilluar 6 operacione të suksesshme”. Autoritetet shqiptare vijojnë kontaktet për shqiptarët që ndodhen ende në Siri, ndërsa për të kthyerit po punohet për riintegrimin e tyre në shoqëri.
