Pritjes po i vjen fundi. Champions League 2026/27 është gati të nisë sezonin e ri, ndërsa të enjten, më 27 gusht, do të hidhet shorti që do të përcaktojë kalendarin e fazës së ligës.
Ceremonia zyrtare do të zhvillohet në Grimaldi Forum në Monaco, duke nisur në orën 18:00. Në këtë edicion do të marrin pjesë 36 skuadra, ndërsa deri tani janë përcaktuar 29 prej tyre. Shtatë ekipet e tjera do të dalin nga ndeshjet e play-off-it të 25 dhe 26 gushtit.
Ndarja në vazo
Skuadrat janë ndarë në katër vazo sipas renditjes së koeficientëve UEFA:
Vazo 1: Bayern Munich, Real Madrid, PSG, Liverpool, Inter, Manchester City, Arsenal, Barcelona, Atletico Madrid.
Vazo 2: Borussia Dortmund, Roma, Sporting Lisbonë, Aston Villa, Porto, Manchester United, Club Brugge, Betis dhe PSV Eindhoven.
Vazo 3: Feyenoord, Lille, Napoli, Leipzig, Villarreal, Shakhtar Donetsk, Galatasaray dhe Bodo/Glimt.
Vazo 4: Slavia Pragë, Stuttgart, Como, Lens, Sabah, LASK.
Si do të zhvillohet faza e ligës?
Çdo skuadër do të luajë 8 ndeshje, duke përballuar nga dy kundërshtarë prej secilës prej katër vazove. Gjysma e ndeshjeve do të zhvillohen në shtëpi dhe gjysma në transfertë.
Do të vazhdojnë të zbatohen edhe kufizimet kryesore: skuadrat nga i njëjti shtet nuk mund të përballen me njëra-tjetrën, ndërsa çdo ekip mund të ketë maksimumi dy kundërshtarë nga e njëjta federatë.
Ndeshjet e fazës së ligës do të zhvillohen nga 8 shtatori 2026 deri më 27 janar 2027.
Një tjetër rregull interesant parashikon që i njëjti çift skuadrash nuk mund të përballet për tre sezone radhazi. Për këtë arsye, nuk do të ketë një tjetër Inter-Arsenal në San Siro, ndërsa Liverpool-Real Madrid nuk do të përsëritet në Anfield.