Allison Guerriero, ish-e dashura e ish-zyrtarit të lartë të FBI-së, Charles McGonigal, ka vdekur papritur në shtëpinë e saj në Florida. Lajmi është raportuar një ditë më parë nga tabloidi britanik Daily Mail, ndërsa rrethanat dhe shkaku i vdekjes nuk janë bërë të ditura.
Guerriero, 52 vjeçe, ndërroi jetë më 27 gusht, sipas babait të saj, Bill, 80 vjeç.
Vetëm disa orë para vdekjes, Guerriero kishte publikuar rreth 75 postime në platformën X, mes tyre edhe video ku kritikonte ish-kolegët e McGonigal dhe kërkonte që vëmendja të përqendrohej edhe te zyrtarë të tjerë federalë.
Në një prej postimeve të saj ajo shprehej:
“E urrej FBI-në.”
Në një tjetër video, të publikuar ditën e vdekjes, Guerriero shfaqej duke ecur në Boynton Beach, Florida, ku kishte nisur të jetonte së fundmi. Ajo foli për pasojat psikologjike që, sipas saj, i kishte lënë sulmi terrorist i 11 shtatorit.
“Sigurisht që jam në mes të gjithë çrregullimit tim post-traumatik të stresit që nga 11 shtatori, por në fakt po marr frymë me lehtësim të madh…”
Guerriero kishte pasur një lidhje rreth 18-mujore me Charles McGonigal, i cili kishte drejtuar sektorin e kundërzbulimit të FBI-së në Nju Jork.
Emri i McGonigal u bë publik në një prej çështjeve më të bujshme që përfshinë një ish-zyrtar të lartë të FBI-së. Ai u shpall fajtor për vepra penale që përfshinin edhe punë të fshehtë në interes të oligarkut rus Oleg Deripaska, ndërsa aktualisht po vuan një dënim prej gjashtë vitesh burg federal.
Guerriero kishte folur publikisht për çështjen dhe kishte qenë kritike ndaj ish-të dashurit të saj. Në një intervistë për Daily Mail në vitin 2024, ajo e kishte cilësuar McGonigal si “tradhtar”, duke argumentuar se ai duhej të kishte marrë një dënim më të rëndë.
Në videot e fundit të publikuara në rrjetet sociale, ajo u bëri thirrje ndjekësve të kërkonin informacione edhe për zyrtarë të tjerë federalë, duke argumentuar se publiku njeh emrat e drejtuesve të FBI-së, por jo të gjithë personat që kanë luajtur role të rëndësishme.
“Ja ku qëndron problemi me Charles McGonigal. Ti e di emrin e tij, por nuk e dije kurrë më parë. Ti e dije emrin e Jim Comey-t. Ti e dije emrin e Chris Wray-t… Pse nuk fillon të kërkosh emrat që nuk i di?”
Deri tani, nuk janë bërë publike detaje zyrtare mbi shkakun e vdekjes së Guerriero-s. Autoritetet vijojnë të hetojnë rrethanat e ngjarjes.a.b
