Ministria e Mbrojtjes ka raportuar për situatën e zjarreve në vend, ku bën me dije se situata paraqitet e përmirësuar dhe pa rrezik për zonat e banuara. Deri në orën 20:00 janë raportuar 26 vatra zjarri, nga të cilat 14 janë shuar, 6 mbeten aktive dhe 6 të tjera janë nën mbikëqyrje.
Në operacionet për menaxhimin e zjarreve janë angazhuar 311 forca operacionale dhe 16 automjete zjarrfikëse. Forcat e Armatosura kanë mbështetur ndërhyrjet me 70 efektivë, një automjet zjarrfikës, një ekskavator të rëndë dhe 3 helikopterë.
Në zonën e Pukës, konkretisht në Tërbun–Gojan–Gjegjan, situata është përmirësuar ndjeshëm. Zjarri është shuar plotësisht në Gjegjan, Gojan të Vogël dhe Gojan të Madh, ndërsa vatra në Prozhëm vijon me intensitet shumë të ulët dhe është drejt shuarjes. Në operacion janë angazhuar forca të MZSH-së, shërbimit pyjor, strukturave vendore, vullnetarë dhe efektivë të Forcave të Armatosura.
Në Gojdan, Fushë-Arrëz, vijon puna për izolimin dhe shuarjen e një vatre në sipërfaqe pyjore. Në terren janë angazhuar strukturat vendore, MZSH-ja, Policia, vullnetarë dhe një helikopter i FA-së. Sipas Ministrisë së Mbrojtjes, nuk ka rrezik për banesat.
Edhe në zonën e Dajtit vijojnë ndërhyrjet për shkak të terrenit të vështirë, por zjarret nuk paraqesin rrezik për zonat e banuara. Gjatë ditës janë angazhuar 30 efektivë të Forcave të Armatosura dhe 30 zjarrfikës, të mbështetur nga një helikopter.
Vatra aktive janë raportuar gjithashtu në Ballenjë dhe Qafën e Helmës në Dibër, si dhe në malin e Luzatit në Tepelenë. Ndërkohë, një sërë vatrash në Lezhë, Elbasan dhe Vlorë janë shuar.
Agjencia Kombëtare e Mbrojtjes Civile vijon monitorimin e situatës në të gjithë territorin, në koordinim me prefekturat, bashkitë dhe strukturat e tjera të emergjencave. Kapacitetet operacionale mbeten në terren dhe në gatishmëri për ndërhyrje të menjëhershme, me prioritet mbrojtjen e jetës së qytetarëve, banesave dhe pasurisë së tyre.