Ka përfunduar takimi i zhvilluar te “Vila e Kuqe”, ku kryeministri Edi Rama u ka dhënë detyra drejtuesve politikë dhe deputetëve socialistë për angazhimin e tyre në terren.
Sipas burimeve, Rama u ka kërkuar socialistëve që të shtojnë praninë në terren dhe të jenë më pranë qytetarëve, duke evidentuar dhe mbledhur problematikat dhe shqetësimet e tyre.
Drejtuesit politikë, së bashku me strukturat e Partisë Socialiste në qarqe, deputetët dhe kryetarët e bashkive, do të hartojnë një plan për zhvillimin e takimeve me qytetarët dhe mbledhjen e problematikave.
Më pas, shqetësimet e evidentuara do të ndahen sipas fushave dhe do t’u përcillen ministrave përgjegjës. Për ndjekjen e procesit dhe zgjidhjen e problematikave, do të delegohet edhe një zëvendësministër.
Një tjetër porosi e Ramës ka qenë që takimet me qytetarët të mos shoqërohen domosdoshmërisht nga kamerat. Sipas tij, fokusi duhet të jetë te komunikimi i drejtpërdrejtë me qytetarët dhe evidentimi real i shqetësimeve të tyre.
Në takim është diskutuar edhe për funksionalizimin e “Pasqyrë Albania”, e cila, sipas burimeve, do të kërkojë një bazë ligjore. Për këtë arsye, pritet të ndiqet një mekanizëm i ngjashëm me atë të parashikuar në Ligjin e Bashkëqeverisjes.
Ndërkohë, ende nuk është përcaktuar një datë për mbledhjen e Asamblesë së Partisë Socialiste.
Ditën e nesërme, kryeministri Edi Rama pritet të zhvillojë një tjetër takim, këtë herë me drejtuesit politikë dhe deputetët e Tiranës. Takimi pritet të zhvillohet në periferi të kryeqytetit.
