Kryeministri Edi Rama po zhvillon sot një drekë pune me drejtuesit politikë dhe deputetët socialistë të Tiranës, në një nga restorantet në periferi të kryeqytetit.
Takimi zhvillohet në vijim të një serie mbledhjesh që Rama ka zhvilluar me ministrat dhe drejtuesit politikë të Partisë Socialiste, në kuadër të strategjisë së re të kësaj force politike për komunikimin dhe afrimin me qytetarët në prag të zgjedhjeve vendore të vitit 2027.
Takimi i sotëm zhvillohet një ditë pasi kryetari i Bashkisë së Tiranës, Erion Veliaj, nga paraburgimi firmosi vendimin për shkarkimin e nënkryetares Anuela Ristani nga detyra e kryetares së komanduar të bashkisë, duke e lënë institucionin pa një kryetar të komanduar, shkruan A2CNN.
Ndërkohë, brenda Partisë Socialiste ka nisur prej kohësh debati për emrin që do të përfaqësojë forcën qeverisëse në garën për Bashkinë e Tiranës në zgjedhjet e vitit 2027.
Mes emrave të përmendur është Ogerta Manastirliu, kandidaturën e së cilës Edi Rama e ka propozuar që në shtatorin e vitit të kaluar.
Në garë politike për këtë post ka hyrë gjithashtu deputeti socialist Erion Braçe, i cili ka kërkuar vazhdimisht që kandidati i PS-së për bashkinë më të madhe në vend të përzgjidhet përmes një procesi gare brenda partisë.
Dreka e sotme me drejtuesit politikë dhe deputetët e Tiranës pritet të jetë pjesë e diskutimeve të socialistëve për organizimin në terren dhe përgatitjet e partisë për zgjedhjet vendore të vitit të ardhshëm.m.k
