Kreu i Partisë Demokratike, Sali Berisha, ka reaguar në lidhje me prishjen e kontratës me kompaninë e Behgjet Pacollit për aeroportin e Vlorës, duke e cilësuar këtë një akt “skandaloz” dhe duke paralajmëruar pasoja të rënda financiare për shtetin.
Berisha tha se Pacolli ka paditur vendin në dy arbitrazhe duke rrezikuar vendin me një gjobë afro 500 milionë euro.
Berisha akuzoi kryeministrin Edi Rama dhe ish-zëvendëskryeministren Belinda Balluku se janë të përfshirë si aksionerë në projekt, duke e lidhur ndërhyrjen e qeverisë me konfliktin mes partnerëve privatë.
“Aeroportet e Edi Ramës janë më keq se djegësat e tij”, deklaroi Berisha.
Sipas tij, problemet mes partnerëve privatë duhet të zgjidheshin përmes gjykatave ose arbitrazhit dhe jo duke e bërë shtetin palë në konflikt.
“Prishja e kontratës me Pacollin e nxjerr Edi Ramën dhe Lubinë e tij lakuriq para shqiptarëve se ata janë aksionerë”, u shpreh Berisha.
Ai paralajmëroi gjithashtu se Shqipëria mund të përballet me gjoba që, sipas tij, mund të arrijnë deri në 500 milionë euro.
“Nuk mund të ketë një akt kurrë që qeveria të futet në zjarr dhe të marrë tani përsipër gjoba që mund të shkojnë edhe 500 milionë euro”, tha Berisha.
Kreu i PD-së pretendoi se Rama dhe Balluku kanë interesa në aksionet e kompanisë turke dhe se përfitimet e tyre lidhen edhe me projektin e aeroportit të Vlorës.a.b
