Më 23 dhe 24 gusht, kryeministri Edi Rama ka thirrur në vilat qeveritare në Pogradec ministrat, drejtuesit politikë dhe kryetarët e komisioneve parlamentare, në një takim ku pritet të analizohet puna e secilit prej tyre dhe të përcaktohen prioritetet për muajt në vijim.
Retreat-i i socialistëve nis të dielën me çështjet e partisë dhe të Parlamentit. Në orën 11:30, drejtuesit politikë dhe kryetarët e komisioneve parlamentare pritet të marrin vërejtjet dhe porositë e kryeministrit.
Me nisjen e sesionit të ri parlamentar, një nga sfidat kryesore për mazhorancën pritet të jetë reforma territoriale, e cila ka hasur në kundërshtime dhe rezistencë politike. Në axhendë pritet të jetë edhe reforma zgjedhore, si dhe miratimi i një sërë ligjesh që lidhen me përafrimin e legjislacionit shqiptar me atë të Bashkimit Europian.
Parlamenti pritet ta nisë sesionin e ri në një klimë të tensionuar politike, ndërsa socialistët duhet të përgatiten paralelisht edhe për zgjedhjet e ardhshme vendore.
Në takimin dyditor në Pogradec pritet të diskutohen gjithashtu performanca e drejtuesve dhe objektivat e mazhorancës për periudhën e ardhshme.m.k
