Interi do të debutojë këtë mbrëmje në Champions League ndaj Real Madridit në “Santiago Bernabéu”, por skuadra zikaltër do të zbresë në fushë me një fanellë të pazakontë: pa sponsorin kryesor në pjesën e përparme.
Arsyeja lidhet me legjislacionin spanjoll, i cili ndalon promovimin e kompanive të basteve dhe lojërave të fatit në aktivitetet sportive. Për këtë shkak, në fanellën e Interit nuk do të shfaqet logoja e Betsson Sport, sponsori kryesor i klubit.
Nuk është hera e parë që Interi luan një ndeshje të Champions League pa sponsor në fanellë. Një situatë e ngjashme ishte parë edhe gjatë sezonit që kulmoi me finalen e humbur ndaj Manchester Cityt.
Në atë rast, arsyeja ishte krejt tjetër: bashkëpunimi me DigitalBits u ndërpre pas një serie pagesash të papërmbushura, duke bërë që Interi të luante disa ndeshje me fanellën plotësisht “të pastër”.
Megjithatë, në finalen e Champions League në Stamboll, Lautaro Martínez dhe shokët e tij kishin një sponsor tjetër në fanellë. Paramount+ u shfaq në uniformën e Interit si pjesë e një marrëveshjeje të kufizuar vetëm për ndeshjet e fundit të kampionatit dhe finalen e Champions League.
Kështu, përballja ndaj Real Madridit do të jetë një tjetër rast ku Interi do të zbresë në fushë pa logon e sponsorit kryesor, këtë herë për shkak të rregullave në fuqi në Spanjë.