Në rang vendi janë raportuar 22 vatra zjarri, prej të cilave 12 aktive, 9 nën mbikëqyrje dhe 1 e shuar, ndërsa strukturat operacionale vijojnë ndërhyrjet në disa qarqe, me mbështetje edhe nga ajri. Ministria e Mbrojtjes bëri të ditur në raportimin deri në orën 20:00 se, në operacione janë angazhuar 498 forca vendore dhe lokale dhe 314 efektivë të Forcave të Armatosura, krahas mjeteve zjarrfikëse, mjeteve mbështetëse, autoambulancave, dronit dhe helikopterëve.
Në Qarkun e Tiranës, zjarri vijon aktiv në Malin e Dajtit, në një sipërfaqe me pyll ahu dhe shkurre. Në operacion janë angazhuar 25 efektivë zjarrfikës, 7 forca të ADM-së, 55 efektivë të FA, 5 mjete, 1 autoambulancë dhe 1 helikopter. Nuk raportohet rrezik për zonat e banuara. Vatra në Kryezi të Kavajës është shuar, ndërsa ajo në Malin e Bërzhitës është izoluar dhe mbahet nën monitorim.
Në Qarkun e Dibrës vijojnë aktive vatrat në Vajkal të Bulqizës, Lundre–Madhesh në Mat, Qafën e Helmes në Bulqizë dhe Cerrujë–Mali i Allushit në Klos. Në Lundre–Madhesh operacioni mbështetet nga 22 efektivë të FA, 3 mjete dhe 1 autoambulancë. Në këto zona nuk raportohet rrezik për banesat.
Në Lezhë aktive mbeten vatrat në Gallatë të Kurbinit dhe në zonën Kalivaç–Zimaj–Kashnjet. Në Gallatë ndërhyrja vështirësohet nga terreni, por nuk ka rrezik për banesat. Në Kalivaç–Zimaj–Kashnjet janë angazhuar 100 forca vendore, pyjore dhe vullnetare, të mbështetura nga 124 efektivë të FA, 16 mjete, 2 autoambulanca dhe 1 helikopter. Edhe këtu nuk raportohet rrezik për zonat e banuara.
Në Qarkun e Elbasanit, vatra në Malin e Qukësit, Përrenjas, është nën mbikëqyrje, ndërsa zjarri në Gurëshpatë të Librazhdit vijon aktiv. Në terren janë angazhuar 6 efektivë dhe 1 automjet i MZSH Librazhd. Nuk ka rrezik për zonat e banuara.
Në Shkodër, vatra mbi Ludric dhe Shopel në Fushë-Arrëz është nën mbikëqyrje. Në Mnelë të Vogël, Vau-Dejës, zjarri vijon aktiv dhe operacioni mbështetet nga 27 efektivë të FA, 3 automjete zjarrfikëse, 1 autobot dhe 1 helikopter. Në Bardhaj–Myselim vijon puna e forcave të MZSH-së, Shërbimit Pyjor, bashkisë dhe vullnetarëve, të mbështetur nga 43 efektivë të FA. Vatra në Bërdicë është nën mbikëqyrje.
Ndërkohë, në Malin e Tërbunit, Pukë, zjarri vijon aktiv në pyll me pishë. Në operacion janë angazhuar forcat vendore dhe 32 efektivë të FA, me 3 mjete dhe 1 autoambulancë. Nuk raportohet rrezik për zonat e banuara.
Në Qarkun e Vlorës, vatra në Bolenë të Himarës është nën mbikëqyrje, ndërsa zjarri në Qesarat të Finiqit vijon aktiv në sipërfaqe me shkurre. Në operacion është angazhuar MZSH Finiq dhe është kryer ndërhyrje me 1 helikopter.
Në Fier, vatrat në Peshtan dhe Çërrilë të Mallakastrës janë nën mbikëqyrje, ndërsa strukturat zjarrfikëse vijojnë monitorimin për të parandaluar riaktivizimet.
Në Durrës, zjarri në Halil të Krujës, i shfaqur pranë zonave të banuara, është izoluar dhe shuar. Zona vijon të monitorohet nga MZSH Krujë.
Në Kukës, vatra në Mamëz, në njësinë administrative Kolsh, është nën mbikëqyrje. Zjarri është shfaqur në një sipërfaqe me shkurre dhe pisha, por nuk raportohet rrezik për zonat e banuara.
Agjencia Kombëtare e Mbrojtjes Civile vijon të ndjekë situatën në të gjithë territorin, në koordinim me prefekturat, bashkitë dhe strukturat e sistemit të Mbrojtjes Civile. Kapacitetet operacionale mbeten në terren dhe në gatishmëri për ndërhyrje, me prioritet mbrojtjen e jetës, banesave dhe pasurisë së qytetarëve.