Gjatë “Marshit për Liri” të zhvilluar në Prishtinë, në mbështetje të ish-krerëve të UÇK-së që po përballen me procesin gjyqësor në Hagë, mes folësve ishte edhe Lirjona Sylejmani, vajza e dëshmorit Bajram Sylejmani.
Në fjalën e saj, Sylejmani solli para pjesëmarrësve dhimbjen e jetës pa të atin, por edhe krenarinë për sakrificën e familjes së saj, e cila i dha Kosovës dy dëshmorë.
Ajo tha se është rritur me mungesën e babait, një boshllëk që sipas saj nuk mund të zëvendësohet, por njëkohësisht me krenarinë që babai dhe xhaxhai i saj dhanë jetën për vendin.
Vajza e dëshmorit kërkoi drejtësi për ish-pjesëtarët e UÇK-së që po gjykohen në Hagë, duke theksuar se e vërteta e luftës dhe sakrifica e shqiptarëve nuk duhet të ndryshohet.
Në fjalimin e saj, ajo u ndal edhe te nevoja për bashkim, duke bërë thirrje që interesi i Kosovës dhe i atdheut të vendoset mbi interesat personale apo partiake.
Mesazhi i saj ishte i qartë: Kosova nuk ka nevojë për ndarje të reja, por për ura bashkimi dhe për ruajtjen e së vërtetës historike.
Në marshim foli edhe Hysni Gucati, kryetar i OVL-UÇK-së. Ai deklaroi se tubimi nuk synon mbrojtjen e individëve, por të vërtetës për luftën e UÇK-së.
Gucati kërkoi një proces të drejtë dhe të paanshëm në Hagë, duke theksuar se liria e Kosovës u arrit përmes sakrificës dhe se asnjë proces gjyqësor nuk mund ta ndryshojë këtë të vërtetë.