Sëmundjet kancerogjene në gjak janë shtuar. Shefi i Shërbimit të Hematologjisë, Dr. Arben Ivanaj, thotë se këto sëmundje nuk kursejnë asnjë grup moshe.
“Shtohen çdo vit 55 raste të reja”, u shpreh doktor Arben Ivanaj. Ai thekson se sëmundjet mund të shfaqen papritur, të ndikuara nga faktorë të jashtëm.
“Ndikon diçka që dëmton gjenin”, deklaroi Ivanaj. Shefi i Shërbimit të Hematologjisë ka një këshillë për qytetarët që të mos bëjnë analiza gjaku pa ia kërkuar mjeku.
“Të dalim nga mentaliteti direkt te laboratori”, tha Ivanaj. Jetëgjatësia mesatare e një pacienti pasi diagnostikohet me kancer të gjakut është mesatarisht 7-8 vjet. Por shefi i Shërbimit të Hematologjisë shpreh disa rezerva në lidhje me trajtimin e pacientëve në Shqipëri.
“Jemi mirë me trajtimin e linjës së parë, diagnozë dhe trajtim i parë, por duhet të shkojmë më tej, i takon vendimmarrësve”, tha Ivanaj. Ai thekson se njohuritë mjekësore kanë avancuar edhe në trajtimin e pacientëve tanë.