Antonio Conte mund të jetë sërish në qendër të planeve të Juventusit. Sipas raportimeve të mediave italiane, në pranverën e vitit 2025 drejtuesit bardhezi kishin vendosur të ndryshonin trajnerin dhe kishin piketuar dy emra: Conte si zgjedhje të parë dhe Gian Piero Gasperini si alternativë.
Në atë periudhë, Conte ishte në krye të Napolit dhe po e udhëhiqte skuadrën drejt titullit kampion. Fillimisht, trajneri dukej i gatshëm të largohej nga Napoli për t’u rikthyer në Torino, ku kishte qenë kapiten dhe simbol i Juventusit. Megjithatë, festa për titullin dhe mbështetja e presidentit Aurelio De Laurentiis ndikuan në vendimin e tij për të qëndruar në Napoli.
Juventusi iu drejtua më pas Gasperinit, por marrëveshja nuk u konkretizua dhe trajneri përfundoi te Roma. Tani, pas emërimit të Luciano Spallettit, situata mund të ndryshojë sërish. Spalletti ka një kontratë edhe për dy vite, me pagë rreth 5 milionë euro neto në sezon, ndërsa Conte në Napoli përfitonte rreth 8 milionë euro plus bonuse.
Nëse sezoni i Juventusit merr një kthesë negative dhe Spalletti largohet, Conte shihet si emri kryesor për ta zëvendësuar. Megjithatë, për momentin bëhet fjalë vetëm për një skenar të mundshëm dhe jo për një marrëveshje konkrete.