Prefekti i Tiranës, Shkëlqim Hajdari, ka ndarë pamje nga një tubim i diasporës shqiptare në Times Square, në Manhattan, në mbështetje të ish-krerëve të UÇK-së të dënuar nga Dhomat e Specializuara në Hagë.
Përmes një postimi në rrjetet sociale, Hajdari ka përcjellë mesazhin e mbështetjes për ish-drejtuesit e UÇK-së, duke theksuar bashkimin e shqiptarëve në diasporë rreth çështjes së Kosovës.
“Të gjithë bashkë, për një qëllim, liri për çlirimtarët!”, shkruan Hajdari në postimin e tij.
Sipas tij, shqiptarët e mbledhur në Manhattan kanë përcjellë një mesazh solidariteti për ish-krerët e UÇK-së, të cilët, siç shprehet ai, “besojmë se janë dënuar padrejtësisht”.
Hajdari thekson se shqiptarët, pavarësisht trevave nga vijnë, bashkohen rreth historisë së Kosovës dhe sakrificës së atyre që luftuan për lirinë e saj.
“Na bashkon Kosova, na bashkon historia jonë dhe respekti për ata që luftuan dhe sakrifikuan për lirinë e saj”, shprehet prefekti i Tiranës.
Në mesazhin e tij nga New York-u, Hajdari vlerëson gjithashtu rolin e diasporës shqiptare, duke nënvizuar se mbështetja për Kosovën dhe ish-pjesëtarët e UÇK-së vazhdon edhe jashtë trojeve shqiptare.
Postimin e tij ai e ka mbyllur me tre fjalë: “Liri , Drejtësi, Dinjitet”, duke përcjellë mesazhin e bashkimit dhe solidaritetit me ish-krerët e UÇK-së që ndodhen përballë proceseve gjyqësore në Hagë.
