Kryeministri Edi Rama udhëtoi drejt Shteteve të Bashkuara të Amerikës ku do të marrë pjesë në punimet e Asamblesë së Përgjithshme të Organizatës së Kombeve të Bashkuara. Nga data 22 deri më 28 shtator, gati 130 liderë botërorë do të mblidhen për të diskutuar mbi sfidat globale. Tema e këtij viti është "Rivendosja e besimit, menaxhimi i transformimit: një OKB që ofron rezultate për të gjithë". Gjatë vizitës, Kryeministri i Shqipërisë do të shoqërohet nga bashkëshortja, Linda Rama, dhe delegacioni zyrtar shqiptar. Në Nju Jork, shefi i ekzekutivit do të marrë pjesë në hapjen e Debatit të Përgjithshëm të Asamblesë së Përgjithshme të OKB-së dhe do t’u drejtohet të pranishmëve me një fjalë. Agjenda parashikon gjithashtu pjesëmarrjen e Kryeministrit në pritje zyrtare, aktivitete të nivelit të lartë dhe takime me përfaqësues të politikës, ekonomisë dhe organizatave ndërkombëtare. Edhe diaspora shqiptare në Shtetet e Bashkuara të Amerikës është pjesë e agjendës së Ramës. Parashikohet që kryeministri të ketë edhe takime me emigrantët që prej vitesh jetojnë dhe punojnë përtej oqeanit.