Kreu i PD-së, Sali Berisha ka hedhur akuza të forta ndaj qeverisë dhe drejtuesve të institucioneve të sigurisë, duke vendosur në qendër të fjalës së tij çështjen e SHISH dhe hetimet për dosjen e AKSHI-t. Në mbledhjen e Kryesisë së PD-së, Berisha pretendoi se zhvillimet e fundit përbëjnë një nga skandalet më të rënda që lidhen me sigurinë kombëtare, duke ia atribuar përgjegjësinë politike kryeministrit Edi Rama.
Duke iu referuar Belinda Ballukut dhe drejtueses së SHISH, Vlora Hyseni, Berisha tha se në rastin e kësaj të fundit është cenuar siguria kombëtare. ”Në qoftë se Lubia ka vjedhur qindra e qindra milionë euro, Lubia tjetër e SHIK-ut ka vjedhur më të çmuarën e një shteti, më të çmuarën e një kombi, atë që quhet siguri kombëtare”, deklaroi ai.
Berisha pretendoi gjithashtu se kontrolli i sistemeve të komunikimit përmes AKSHI-t ka vënë në rrezik të dhënat e qytetarëve shqiptarë dhe të huajve në Shqipëri. Sipas tij, këto të dhëna janë vënë në dispozicion të grupeve kriminale, por edhe të aktorëve që ai i cilësoi si kundërshtarë të Shqipërisë dhe NATO-s.
”Grupi mafioz i AKSHI-t është grupi mafioz më i rrezikshëm në Evropë sepse ai vendosi me urdhër të Ramës, në kontroll të plotë dhe total, internetin dhe komunikimin me internet për shqiptarët dhe të huajt në territorin e Republikës së Shqipërisë”, tha Berisha. Ai e lidhi çështjen me rolin e drejtuesve të institucioneve të sigurisë dhe marrëdhëniet e Shqipërisë me shërbimet partnere.
“Njeriu, që përfaqësonte Shqipërinë në partneritetin më të rëndësishëm, më delikat, më serioz, partneritetin me shërbimet e vendeve mike, rezulton se ishte një anëtare e grupeve më të rrezikshme mafioze kriminale”, tha kreu i PD-së.