Ish-ministri i Mbrojtjes, Pirro Vengu ka reaguar ndaj akuzave të ish-zëvendëskryeministrit Arben Ahmetaj për trafik armësh nga Ministria e Mbrojtjes. I ftuar në “Koha Jonë Debat” me Nikoll Lesin, Vengu i cilësoi akuzat si “të pabazuara dhe totalisht të ekzagjeruara”, duke theksuar se eksportet e armatimit kontrollohen nga institucione të posaçme shqiptare. “Shteti shqiptar nuk negocion në hije. Shteti shqiptar negocion përmes institucioneve që janë të pajisura me autorizime”, deklaroi Vengu.
Pjesë nga debati
Lesi: Zoti Vengo, ju keni qenë ish-ministër i Mbrojtjes dhe keni firmosur kontrata. Mos gabohem ka pasur një marrëveshje që u bë zhurmë e madhe në Serbi, mes Kroacisë, Kosovës dhe Shqipërisë, apo jo? Ju keni qenë që keni firmosur. Realisht Shqipëria, ka armë domethënë moderne që në çdo rast mund të jemi krenarë, mund të jemi të sigurtë që ky vend ka armë për të përballuar ndonjë agresion që nuk ndodh se jemi anëtar i NATO-s, por gjithsesi njeriu thotë kemi kemi armë ose kemi industri të fuqishme.
Vengu: Është një pyetje me vend që ma bëjnë shpesh edhe me një farë cinizmi, ndonjëherë ironi që a është e aftë Shqipëria, a ka kapacitete? A mund të mbrohemi në rast të një agresioni? Sa kohë mund të rezistojmë derisa të vijë aleanca në përforcim dhe në mbrojtje? Atë që mund t’ju them është që në dy vitet e kaluara, ne nuk kemi bërë vetëm ceremoni dhe shpallje përsa i përket industrisë. Janë ndërtuar themelet e kësaj industrie, janë rigrupuar asetet e vjetra.
Ju jeni gazetarë me eksperiencë dhe i keni ndjekur çështjet e degradimit gjatë tranzicionit të aftësive tona, qoftë industriale, qoftë teknologjike. Atë që qeveria bëri me një ligj të posaçëm. Ne rigrupuam të gjitha asetet e vjetra, Poliçanin, Gramshin, Mjekësin, ish-uzina e autotraktorëve nën një kompani shtetërore që quhet Kajo dhe përmes saj nënshkruam gjashtë marrëveshje. I përmendët në insertin dhe ju falenderoj për këtë. Dhe këto marrëveshje kanë filluar të prodhojnë efekt. Prodhimet e para kanë filluar.
Përmendet vetëm rasti i mjeteve të blinduara dhe mjeteve taktike, por kemi uniformat, municionet. Brenda këtij viti do përfundohet dhe linja e prodhimit të municioneve. Do t’i kemi vitin që vjen. Armatimi i lehtë, dronët, sistemit antidron dhe posaçërisht dy marrëveshje për të cilat jam veçanërisht krenar dhe personalisht i angazhuar si deputet i Vlorës. Pasha Limani për prodhimin e anijeve me finkantierin italian dhe nga ana tjetër ringritja e shkollës së aviacionit, një kapacitet shumë i rëndësishëm. Më bëjnë shpesh pyetjen pse s’ka Shqipëria avion. Shqipëria po fillon të ketë të rigetë avion zjarrëfikës për momentin, por ky është hapi i parë stërvitor për emergjencat civile dhe më tej pse jo të kemi kapacitete pilotimi edhe për avion me kapacitete luftimi.
Lesi: Zoti ish-ministër, para ca ditësh ndoqëm ish-zvkryeministrin Arben Ahmetaj në një intervistë të gjatë që e akuzoi Ministrinë e Mbrojtjes që ka trafik armësh. Ka patur apo ka trafik armësh apo është një akuzë e rëndomtë e zotit Ahmetaj?
Vengu: Atëherë nuk nuk do marr përsipër këtu para jush, për më tepër as të bëj avokatin, as magjistratin, as analistin, të treja profesione të respektuara që s’dua t’i ushtroj pa liçencë këtu. Për më tepër nisur nga një material televiziv që gjykoj që nuk është as akt akuzë, aq më pak akt gjykim. Atë që mund t’ju them, si titullar, si pjesëmarrës diplomacinë shqiptare, si titullar edhe i drejtorisë antikorrupsion për disa vite, portit të Durrësit dhe më tej si titullar i Ministrisë së Mbrojtjes, është që shteti shqiptar nuk negocion në hije.
Shteti shqiptar negocion përmes institucioneve që janë të pajisura me autorizime për ta bërë këtë gjë. Me pak fjalë, në Shqipëri nuk ka ministra në hije. Çfarëdo të thuhet apo të dëgjohet në materialin televiziv që ju përmendët. Dua t’u them gjithashtu se ka një kakofoni të madhe kur vjen puna në debatin publik për mbrojtjen. U përmend trafik armësh. E gjykoj tërësisht të pamundur nga momenti ku linjëzimi jonë dhe institucioneve tona të kontrollit të eksporteve të armatimit, se ka Shqipëria institucione kontrolli eksportesh të armatimit dhe të mjeteve me përdorim të dyfishtë.
Janë institucione të mirë stërvitura, të linjëizuara në përditshmërinë e tyre me institucione ligjzbatuese amerikane dhe aleate, dhe gjykoj që këto institucione kanë vepruar dhe kanë bërë punën e tyre siç duhet. Akuzat për për trafikim armësh i gjykoj të pavënda dhe totalisht të ekzagjeruara në këtë rast. Kështu që nuk do ndërmerrja fare të t’i hyja kësaj teme, përveçse siç e thashë, patjetër unë kam qenë titullar në të gjitha këto institucionet që përmendava më përparë.