Monika Kryemadhi edhe pas daljes nga SPAK, nuk la pas humorin. Ajo tha se Vlora Hyseni kishte vendosur gjithë Shërbimin Informativ në funksion të përndjekjes së kundërshtarëve politikë të kryeministrit Edi Rama, por edhe në funksion të kundërshtarëve të Ergys Agasit.
Duke cituar mesazhet mes Hysenit dhe Agasit, të rrjedhura nga dosja e SPAK, Kryemadhi me ironi tha se ish-drejtuesja e SHISH për ”një rrahje zemre i fikte radarët, imagjino për një anije apo nëndetëse”.
Monika Kryemadhi ka krahasuar situatën e ish-bashkëshortit të saj, Ilir Meta, me atë të ish-drejtores së SHISH, Vlora Hyseni, duke pretenduar se Meta mbahet në paraburgim pa prova, ndërsa Hyseni hetohet në gjendje të lirë.
“SPAK ka individë që akuzohen për grupe të strukturuara kriminale dhe janë në gjendje të lirë me detyrim paraqitje, ndërkohë që zoti Meta është për asgjë, sepse e gjithë dosja rrotullohet rreth meje”, deklaroi Kryemadhi.
Ajo kritikoi gjithashtu situatën e radarëve dhe përdorimin e institucioneve, duke thënë: “Ish-bashkëshorti i ndizte radarët se kishte hallin e Shqipërisë, hallin e Kushtetutës. Kushtetutën këta e kanë përdorur si letër higjienike”. Kryemadhi tha se bojkoti i avokatëve po ndikon edhe në procesin ndaj Metës, pasi sipas saj çdo shtyrje “është në kurriz të zotit Meta”.