Në shkollën e mesme profesionale “Thoma Papapano” në Gjirokastër, dega e hoteleri-turizmit rrezikon të mos hapet këtë vit për shkak të numrit të ulët të regjistrimeve.
Edhe pse procesi i regjistrimit vijon deri në fund të shtatorit, deri tani numri i nxënësve është shumë më i ulët se minimumi i nevojshëm për krijimin e një klase. Shkolla, e cila pret nxënës nga Gjirokastra dhe zonat e tjera të jugut, këtë vit ka regjistruar një rënie të ndjeshme të interesit për këtë profil.
Të rinjtë që kanë zgjedhur arsimin profesional janë orientuar kryesisht drejt degëve të teknologjisë së informacionit dhe shërbimeve të automjeteve, ndërsa hoteleri-turizmi ka mbetur me pak regjistrime.
Drejtuesja e shkollës e lidh këtë situatë me mungesën e një perspektive të qartë për punësimin e të rinjve pas përfundimit të studimeve. Sipas saj, interesi mund të rritej nëse bizneset e sektorit do të orientoheshin më shumë drejt punësimit të stafit të kualifikuar.
Një tjetër faktor që ndikon në zgjedhjet e nxënësve, sipas drejtueses, është orientimi që marrin në përfundim të arsimit 9-vjeçar, ku shpesh këshillohen të vijojnë gjimnazin dhe jo arsimin profesional.
Situata shihet si shqetësuese për një qytet ku turizmi është ndër sektorët kryesorë të ekonomisë. Mungesa e interesit për degët e hoteleri-turizmit mund të ndikojë në formimin e profesionistëve të rinj dhe të thellojë mungesën e fuqisë punëtore të kualifikuar në këtë sektor.
