Një 28-vjeçar është arrestuar në Shkodër në kuadër të operacionit antidrogë të koduar “Reaction”, pasi dyshohet se merrej me shpërndarjen e lëndëve narkotike, kryesisht në zonat pranë perimetrit të sigurisë së shkollave.
Në pranga ka rënë shtetasi Erdis Zeneli, banues në Shkodër, i cili u kap në flagrancë nga shërbimet e Forcës së Posaçme “Shqiponja”. Sipas policisë, ndërhyrja u krye pas sigurimit të një informacioni në rrugë operative, që lidhej me aktivitetin e dyshuar të të riut në fushën e narkotikëve.
Gjatë kontrollit të automjetit që drejtonte 28-vjeçari, efektivët gjetën një sasi lënde të dyshuar narkotike Cannabis Sativa. Kontrollet vijuan edhe në banesën e tij, ku u zbulua një tjetër sasi kanabisi, e ndarë në doza dhe e përgatitur për tregtim.
Në total, policia sekuestroi rreth 1.5 kilogramë lëndë të dyshuar narkotike Cannabis Sativa, ndërsa një pjesë e saj raportohet se ishte në formë xhelatinoze. Në cilësinë e provës materiale u sekuestruan gjithashtu automjeti i 28-vjeçarit, një aparat celular, peshore elektronike dhe pajisje për paketimin me vakum të lëndës narkotike.
Nga veprimet hetimore të kryera deri në këtë fazë, policia dyshon se Zeneli e siguronte drogën me qëllim shitjen e saj, veçanërisht në afërsi të shkollave, brenda zonave të përcaktuara si perimetër sigurie.
I riu u arrestua në flagrancë dhe materialet procedurale në ngarkim të tij i janë referuar Prokurorisë së Shkodrës për vijimin e hetimeve dhe përcaktimin e përgjegjësive ligjore. Hetimet pritet të vijojnë për të zbardhur më tej mënyrën e sigurimit dhe shpërndarjes së lëndës narkotike.