Presidenti i Partisë së Lirisë, Ilir Meta reagoi nga qelitë e burgut për zvarritjen e proceseve gjyqësore për shkak të konflikti mes Gjykatës së Posaçme dhe dhomës së avokatisë, të cilën e konsideron absurde. Facebook Meta: “Konflikti absurd midis GJKKO Shkallë e Parë dhe Dhomës Kombëtare të Avokatisë ka sjellë anullimin dhe shtyrjen e gjykimit për dhjetëra çështje vetëm pranë GJKKO të Shkallës së Parë. Kjo situatë absurde e paralajmëruar që në fund të korrikut duhej të ishte parandaluar me kohë si përmes dialogut, por edhe ndërhyrjes së Këshillit të Lartë Gjyqësor, Kuvendit të Shqipërisë dhe aktorëve të tjerë. Përveç humbjeve të konsiderueshme financiare të shtetit dhe palëve të interesuara, ka sjellë edhe zvarritjen e proceseve gjyqësore, që është element i gjykimit të drejtë dhe të rregullt.” Meta shton se ky konflikt i shërben vetëm lojërave politike dhe minon besimin e qytetarëve tek politika. Facebook Meta: “Vendosja e avokatëve në një presion të dyfishtë si nga GJKKO Shkallë e Parë edhe Dhoma Kombëtare e Avokatisë, cënon jo vetëm të drejtat e tyre, por drejtpërdrejt të drejtat thelbësore të qytetarëve të përfshirë në proceset penale. Roli i avokatëve në funksion të procesit të rregullt ligjor është i pazëvendësueshëm. Edhe në diktaturë ka patur gjyqtarë dhe prokurorë, por demokracia dhe shteti i së drejtës, dallon ndër të tjera nga diktatura se siguron të drejtën e mbrojtjes me avokat. Ky konflikt i stisur dhe arbitraritet i shërben vetëm lojrave politike dhe minon besimin publik te drejtësia dhe sistemi gjyqësor.” Avokatët po bojkotojnë proceset gjyqësore për shkak se nuk pajtohen me rregulloren e re të Gjykatës së Posaçme, që ndalon pajisjet celulare dhe kompjuterat në sallën e gjyqit.