Kombëtarja e Suedisë është përballur me një situatë të pazakontë shëndetësore në prag të ndeshjes së Nations League ndaj Bosnjë-Hercegovinës.
Pak para sfidës së zhvilluar në Zenicë, një vatër e fortë gripi ka prekur disa prej futbollistëve suedezë, duke i detyruar ata të mungojnë në dispozicion të trajnerit Graham Potter.
Mes lojtarëve të prekur ishin Yasin Ayari, Benjamin Nygren, Gustaf Lagerbielke, Elliot Stroud dhe Patrik Walemark. Të bashkuar me futbollistët që ishin tashmë të dëmtuar, numri i mungesave për Suedinë arriti në 11 lojtarë.
Situata ka detyruar stafin e kombëtares të marrë masa të menjëhershme për të parandaluar përhapjen e infeksionit. Mjeku i Suedisë, Jonas Werner, bëri të ditur se lojtarët me simptoma janë vendosur në izolim.
“Po bëjmë gjithçka që është e mundur për të kufizuar përhapjen e infeksionit dhe po monitorojmë me kujdes gjendjen e lojtarëve që janë sëmurë”, deklaroi Werner.
Për të plotësuar grupin, Federata Suedeze u detyrua të bëjë edhe thirrje urgjente. Felix Beijmo, Samuel Dahl, Hugo Bolin, Ken Sema dhe Eric Smith iu bashkuan ekipit në një moment të papritur.
Edhe trajneri Graham Potter pranoi se situata ishte e pazakontë dhe e vështirë për t’u menaxhuar.
“Nuk kam përjetuar kurrë më parë një situatë me kaq shumë probleme në të njëjtën kohë”, u shpreh tekniku suedez.
Pavarësisht vështirësive, Suedia arriti të marrë një pikë në transfertën ndaj Bosnjës. Ndeshja përfundoi 1-1. Viktor Gyökeres kaloi suedezët në avantazh, ndërsa barazimi për vendasit u realizua nga futbollisti i Juventusit, Alajbegovic.