Viti i ri akademik nisi edhe për shkollën e Magjistraturës. Në këtë ditë, një mesazh për brezin e ri të magjiistratëve erdhi nga presidenti Bajram Begaj, për të cilin integriteti dhe profesionalizmi i të rinjve do të jetë përcaktues për suksesin e drejtësisë së reformuar. “Brezi juaj ka një përparësi historike: ju po hyni në sistemin e drejtësisë që reforma ndërtoi. Kjo vjen edhe me një përgjegjësi të shtuar: ju, me integritetin dhe profesionalizmin tuaj, do të bëni që ky sistem të funksionojë me efektivitet. Aseti më i çmuar i drejtësisë, që duhet fituar, është besimi: besimi se çdo individ do të dëgjohet; se çdo pretendim do të shqyrtohet me paanshmëri; se ligji do të zbatohet njësoj për të gjithë; se pushteti i drejtësisë do të ushtrohet me përulësinë dhe përgjegjësinë që kërkon shteti i së drejtës”. Presidenti Begaj theksoi se tanimë drejtësia është në fazën e rezultateve të prekshme.