Thethi u shndërrua këtë fundjavë në një pikëtakim për të rinjtë e angazhuar në kuadër të YouthCamp 2026, një nismë që synon t’u japë hapësirë ideve, diskutimit dhe bashkëpunimit për të ardhmen e Shkodrës. Për dy ditë, të rinjtë u bënë pjesë e diskutimeve mbi sfidat dhe mundësitë që lidhen me qytetin, duke ndarë mes tyre ide dhe propozime që mund të kthehen në iniciativa konkrete për komunitetin.
Kryeministri Edi Rama e vlerësoi organizimin e YouthCamp 2026, duke e cilësuar si një mundësi për të mbledhur energjinë dhe kreativitetin e të rinjve dhe për t’i orientuar ato drejt nismave konkrete për Shkodrën. “YouthCamp 2026 në Theth, ku dy ditë takimesh mes një grupi të rinjsh bashkuan ide për t’i kthyer ato në nisma konkrete për Shkodrën”, shkruan Rama.
Mes peizazhit të Thethit, diskutimet u ndërthurën edhe me aktivitete të përbashkëta, duke krijuar një atmosferë më të afërt dhe larg formateve tradicionale të takimeve. Në qendër të aktivitetit ishte një mesazh i qartë: të rinjtë nuk duhet të jenë vetëm dëgjues, por pjesëmarrës aktivë në vendimmarrjen dhe zhvillimin e komunitetit ku jetojnë. Pikërisht idetë, energjia dhe kreativiteti i tyre synohet të shërbejnë si një nga shtysat për iniciativa të reja që mund të ndikojnë në të ardhmen e Shkodrës.
