Ministri për Evropën dhe Punët e Jashtme, Ferit Hoxha ka reaguar pas komunikimit të Komisioneres Evropiane për Zgjerimin, Marta Kos për përgatitjet e Bashkimit Evropian për anëtarësimin e vendeve të reja. Përmes një reagimi në platformën “X”, Hoxha deklaroi se Shqipëria është e gatshme të vijojë procesin e reformave dhe të bashkëpunojë ngushtë me vendet anëtare dhe Komisionin Evropian për një rrugëtim drejt anëtarësimit që të jetë ambicioz, por njëkohësisht realist.
“Shqipëria është gati. Jo vetëm për t’u anëtarësuar në Bashkimin Evropian, por edhe për të ndihmuar në formësimin e së ardhmes së tij”, u shpreh ministri. Sipas Hoxhës, procesi i zgjerimit nuk duhet parë vetëm si një detyrë e vendeve kandidate. Ai kërkon gjithashtu që vetë Bashkimi Evropian të jetë i përgatitur për të mirëpritur anëtarët e rinj.
“Zgjerimi nuk ka të bëjë vetëm me gatishmërinë e vendeve kandidate për t’u anëtarësuar. Ai ka të bëjë po aq edhe me gatishmërinë e Bashkimit Evropian për t’i mirëpritur ato”, theksoi ai. Ministri e cilësoi zgjerimin një projekt strategjik të përbashkët, që për Shqipërinë nënkupton forcimin e demokracisë dhe përmirësimin e jetës së qytetarëve, ndërsa për Evropën sjell më shumë siguri, konkurrueshmëri dhe qëndrueshmëri demokratike.
Hoxha rikonfirmoi angazhimin e Shqipërisë për të përmbushur reformat dhe për të avancuar në procesin e integrimit përmes hapave konkretë dhe me ndikim. Në përfundim të reagimit të tij, ministri e cilësoi zgjerimin si një pjesë të rëndësishme të së tashmes dhe së ardhmes së Evropës, duke nënvizuar se një proces i tillë e bën kontinentin më të fortë dhe më të bashkuar. “Për një Evropë më të fortë në shtëpi. Një Evropë më të fortë në botë”, përfundoi Hoxha.