Reforma e re territoriale vijon të jetë në qendër të debatit politik, ndërsa mazhoranca është e vendosur ta votojë sonte në Kuvend, pavarësisht mungesës së konsensusit me opozitën. Në një intervistë për Vizion Plus, deputeti socialist Erion Malaj tha se riorganizimi synon t’u japë bashkive më shumë kapacitete dhe funksionalitet, me qëllim përmirësimin e shërbimeve për qytetarët.
“Qëllimi parësor është t’u ofrojmë qytetarëve një shërbim më të mirë”, deklaroi Malaj. Sipas tij, bashkitë aktuale në shumë raste nuk kanë kapacitetet e nevojshme për të përmbushur të gjitha funksionet. Malaj theksoi se njësitë më të mëdha do të kenë mundësi më të mira për të përballuar edhe kërkesat që lidhen me procesin e integrimit evropian.
Ai pranoi se reforma nuk ka marrë konsensusin e opozitës, por tha se mazhoranca ka zhvilluar dëgjesa publike dhe se procesi nuk mund të ndalet për shkak të mungesës së marrëveshjes politike. Një tjetër pikë e debatit është krijimi i 77 qyteteve si njësi të reja administrative. Malaj hodhi poshtë akuzat se bëhet fjalë për një artificë politike, duke argumentuar se qytetet do të kenë përfaqësim në këshillat bashkiakë dhe në drejtimin e bashkive të reja.
“Çdo qytet do të ketë një nënkryetar bashkie në bashkinë e madhe”. Sa i përket deputetëve socialistë që kanë shprehur kundërshtime ndaj reformës, Malaj tha se secili deputet është i lirë të mbajë qëndrimin e tij, ndërsa grupi parlamentar i PS-së ka vendosur të votojë pro. Malaj thotë se mazhoranca i ka votat e nevojshme për miratimin e reformës, duke e cilësuar atë si një proces të rëndësishëm për organizimin e pushtetit vendor.