Kryeministri Edi Rama ka njoftuar krijimin e Ministrisë së Administratës Publike, e cila pritet të ngrihet javën e ardhshme dhe do drejtohet nga ministrja aktuale e Shtetit për Administratën Publike dhe Anti-Korrupsionin, Adea Pirdeni. Gjatë prezantimit të platformës “Shkalla e Meritës”, Rama theksoi rëndësinë që ka administrata publike në procesin e integrimit europian të vendit, duke argumentuar se nevojitet një strukturë e posaçme për të zgjeruar përgjegjësitë dhe objektivat në këtë drejtim.
“Do të krijojmë javën e ardhshme Ministrinë e Administratës Publike, pikërisht se tanimë tema e administratës publike është një temë shumë qendrore e punës së qeverisë dhe e shtetbërjes së mëtejshme europiane të Shqipërisë”, deklaroi kryeministri.
Sipas Ramës, ngritja e ministrisë së re synon t’i japë më shumë hapësirë zhvillimit të një administrate profesionale dhe forcimit të institucioneve shtetërore, në përputhje me standardet e vendeve europiane. “Është nevoja që përmes kësaj ministrie, që e kanë shumë vende të tjera europiane, ne të zgjerojmë gamën e detyrave, punëve e ambicieve për të ngritur më lart shtetin europian të shqiptarëve”, u shpreh ai.
Kreu i qeverisë bëri të ditur gjithashtu se drejtimi i institucionit të ri do t’i besohet Adea Pirdenit, e cila aktualisht mban postin e ministres së Shtetit për Administratën Publike dhe Anti-Korrupsionin. “Nuk diskutohet që Ministrinë e Administratës Publike mund ta drejtojë dhe ta çojë përpara vetëm ministrja e Shtetit për Administratën Publike, Adea Pirdeni”, tha Rama. Kjo nismë lidhet me objektivin e Shqipërisë për t’u anëtarësuar në Bashkimin Europian deri në vitin 2030.
