Shqipëria reagon ndaj deklaratave provokuese të zëvendëskryeministrit dhe ministrit serb, Ivica Daçiq. Ky i fundit, gjatë një tubimi elektoral në kuadër të fushatës në Serbi, u zotua para audiencës së tij se "herët a vonë, flamuri serb do të valëvitet sërish në Prizren". Kryediplomati shqiptar Ferit Hoxha e ka cilësuar këtë qëndrim si një retorikë të rrezikshme nxitëse që kërcënon drejtpërdrejt paqen dhe stabilitetin në Ballkanin Perëndimor, duke rikonfirmuar mbështetjen e palëkundur të Tiranës për sovranitetin e plotë të Kosovës. Ministri Hoxha paralajmëroi se deklarata të këtij lloji mbartin rrezikun e lartë për t'u dhënë zemër dhe për të frymëzuar elementë radikalë që të kryejnë akte agresioni në teren. “Këtë e kemi parë edhe më parë, shumë herë. Ngjarja e Banjskës, për të cilën ende nuk është vendosur përgjegjësia e plotë, mbetet një kujtesë e fortë e asaj që mund të ndodhë kur fjalët kthehen në veprime”, thuhet në deklaratën e tij.