Interi rikthehet në skenën e Ligës së Kampionëve, një muaj pas debutimit në transfertën ndaj Real Madridit. Zikaltrit synojnë të nisin me këmbën e mbarë aventurën evropiane në shtëpi, ku të martën në orën 21:00 do të përballen me Club Brugge.
Ambiciet e klubit milanez janë të mëdha. Ëndrra për të përsëritur tripletën e vitit 2010, të fituar nën drejtimin e Jose Mourinhos, mbetet një objektiv që ushqen shpresat e tifozëve. Presidenti Beppe Marotta e ka shprehur së fundmi bindjen se ëndrrat mund të bëhen realitet, ndërsa skuadra synon ta dëshmojë këtë edhe në fushën e lojës.
Për sfidën evropiane, trajneri pritet të rikthejë në formacion titullarët kryesorë. Në sulm do të jenë Lautaro Martinez dhe Marcus Thuram. Kapiteni argjentinas, i cili ndaj Parmës e nisi ndeshjen nga stoli pas udhëtimit ndërkontinental, synon t’i japë fund serisë prej gjashtë ndeshjesh pa shënuar në Champions League. Goli i tij i fundit në këtë kompeticion daton më 5 nëntor 2025, në përballjen kundër Kairatit.
Edhe mesfusha pritet të pësojë ndryshime. Barella dhe Zielinski do të rikthehen në formacion, ndërsa Calhanoglu do të marrë rolin e organizatorit. Turku, i cili ndaj Parmës u zëvendësua në minutën e 62-të dhe u pa më pas me akull në gju, është në gjendje të mirë dhe pritet të jetë titullar.
Në mbrojtje, Akanji dhe Bastoni pritet të rikthehen, ndërsa Bisseck është kandidat për të ruajtur vendin në qendër ose në krahun e djathtë të repartit defensiv. Dyshimi i vetëm kryesor është në të djathtë, ku Diouf dhe Luis Henrique konkurrojnë për një vend në formacion. Dimarco pritet të luajë në krahun e majtë, ndërsa Martinez do të jetë në portë.