Pas disa muajsh vendi me hartën e re territoriale, do të shkojë në zgjedhjet lokale të 2027. Ende partitë nuk kanë konfirmuar emrat e kandidatëve. Anëtari i Këshillit Kombëtar të Partisë Demokratike, mjeku Ilir Alimehmeti, shpreh gatishmërinë për të garuar për postin e kryebashkiakut të Tiranës në zgjedhjet vendore të vitit 2027. Ai thekson se kandidatura e tij dhe emrat e tjerë të mundshëm do të diskutohen nga opozita, ndërsa shton se drejtuesit e saj janë në dijeni të gatishmërisë së tij.
“Unë i kam vënë në dispozicionin tim opozitës. Opozita do të ulet dhe do ta diskutojë këtë kandidaturë dhe të tjerat”, u shpreh Alimehmeti, duke lënë të hapur mundësinë që në garë të ketë edhe pretendentë të tjerë.
Duke folur për sfidat politike në vend, ai e cilësoi përballjen me qeverisjen e kryeministrit Edi Rama si një çështje me rëndësi për interesin publik. Sipas tij, zgjedhjet vendore duhet të jenë në fokusin kryesor të opozitës. “Unë mendoj që interesi publik është referendumi publik kundër Ramës, sepse është bërë një lloj kanceri që po na mbyt të gjithëve”, deklaroi Alimehmeti në ”Report TV”.
Sekretari i Përgjithshëm i PD-së, Flamur Noka i ftuar së fundmi në ”KOHA JONË-DEBAT”, veçoi mjekun Ilir Alimehmeti. Ai tha se mjeku është një nga emrat më potencialë për të përfaqësuar opozitën në garën për Bashkinë e Tiranës.
“Ilir Alimehmeti është një intelektual, një mjek i nderuar, një potencial i madh për Tiranën. Ai do t’i bënte nder Tiranës me kandidaturën”, u shpreh Noka. Nga ana tjetër, ai sqaroi se kandidatura nuk është ende zyrtare dhe se PD ka përpara një proces të brendshëm për përzgjedhjen e kandidatit.
Flamur Noka zbulon kandidatin PD për Tiranën: Është figura më potenciale….