Kreu i grupit parlamentar i PD, Gazment Bardhi ka dënuar ashpër dhunën e policisë ndaj studentëve protestues, duke kërkuar lirimin e menjëhershëm të personave të ndaluar dhe ndëshkimin e përgjegjësve për dhunën.
Në një reagim publik, Bardhi akuzon qeverinë për mashtrim lidhur me situatën në Spitalin e Traumës, ku sipas tij, ndodhen deputetët Jorida Tabaku dhe Tritan Shehu. Ai pretendon se në spital nuk ka asnjë punonjës policie të shtruar, ndërsa të paktën tre qytetarë me dëmtime serioze po marrin trajtim mjekësor.
Bardhi u ka bërë thirrje studentëve dhe qytetarëve nga Tirana dhe e gjithë Shqipëria, pavarësisht bindjeve politike dhe ideologjike, që t’i bashkohen protestës studentore, duke e krahasuar situatën me lëvizjen studentore të vitit 1991.
Postimi i plotë
Dënojmë me forcën më të madhe dhunën e egër të policisë së narkoshtetit kundër studentëve, të cilët janë duke ushtruar të drejtën kushtetuese për protestë.
Aktualisht në Spitalin e Traumës ku ndodhen kolegët deputetë Jorida Tabaku dhe Tritan Shehu, ndryshe ngasa mashtroi Qeveria, nuk ka asnjë punonjës policie të shtruar në spital, ndërkohe që ka të paktën 3 qytetarë me dëmtime serioze që po marrin trajtim mjekësor.
I bëjmë thirrje çdo studenti dhe studenteje, çdo qytetari të lirë, të Tiranës dhe gjithë Shqipërisë, pa dallim partie dhe ideologjie, që ashtu si në vitin 1991, t’i bashkohet rinisë studentore.
Theksojmë se kërkesat e studentëve dhe të pedagogëve dhe qytetarve janë të drejta dhe ne i mbështesim plotësisht. Gjithashtu, për këto kërkesa dhe për shumë të tjera, të fermerëve, minatorëve, fasonëve, profesioneve të lira, ka vetëm një zgjidhje: largim i menjëhershëm i Edi Ramës, kreut të narkoshtetit.
Kërkojmë lirimin e menjëhershëm të të ndaluarve në mënyrë të paligjshme dhe dënimin e autorëve dhe urdhëruesve të dhunës shtazore!