Agjencia e Mbikëqyrjes Policore, ka arrestuar efektivin e Policisë ‘Shqiponja’ në Tiranë me iniciale I.T., të përfshirë në aksidentin me pasojë vdekjen e një 66-vjeçari, që lëvizte me biçikletë në aksin Tiranë–Rinas. Sipas njoftimit zyrtar, ngjarja ka ndodhur 45 minuta pas mesnatës së 15 tetorit, në rrugën Tiranë–Rinas, pranë kryqëzimit të fshatit Domje, ku automjeti me drejtues punonjësin e Policisë është përplasur me një biçikletë. Si pasojë e përplasjes, ka humbur jetën në vendngjarje drejtuesi i biçikletës, 66 vjeç. Pas kryerjes së veprimeve të para hetimore, efektivit të ‘Shqiponjave’ iu krye testi i alkoolit, i cili rezultoi negativ, me vlerën 0.0 mg/l. Në vijim të veprimeve procedurale, u bë arrestimi i tij për veprën penale “Shkelja e rregullave të qarkullimit rrugor”. Agjencia e Mbikëqyrjes Policore njofton se në bashkëpunim me Prokurorinë, vijon veprimet hetimore për dokumentimin e plotë të rrethanave të ngjarjes dhe përcaktimin e përgjegjësive ligjore.