Gjimnazistë dhe nxënës të shkollave në Rrëshen kanë braktisur mësimin këtë të premte, duke iu bashkuar protestës në mbështetje të revoltës studentore që ka shpërthyer në Tiranë. Të rinjtë kanë dalë në rrugët e qytetit për të shprehur solidaritetin e tyre me studentët protestues, të cilët prej ditësh janë ngritur në protesta për të kërkuar plotësimin e kërkesave të tyre.
Marshimi i nxënësve në rrugët e Rrëshenit tregon se vala e protestave studentore po gjen mbështetje edhe përtej kryeqytetit, duke përfshirë gjithnjë e më shumë të rinj në qytete të ndryshme të vendit. Me daljen e tyre në protestë, gjimnazistët dhe nxënësit synojnë t’i japin një tjetër dimension revoltës studentore, duke treguar se shqetësimet dhe kërkesat e studentëve nuk kanë mbetur vetëm brenda mureve të universiteteve.
Siç shihet edhe në pamjet e siguruara nga “Koha Jonë”, situata në Rrëshen paraqitet e qetë, ndërsa nxënësit vijojnë marshimin në rrugët e qytetit. Deri në momentin e raportimit, nuk bëhet e ditur për incidente gjatë protestës së zhvilluar nga të rinjtë në këtë qytet.
Situata paraqitet ndryshe në disa qytete të tjera të Shqipërisë, ku gjatë protestave janë shënuar edhe incidente. Në Rrëshen marshimi i nxënësve vijon në mënyrë të qetë, ndërsa ata shprehin mbështetjen e tyre për studentët që kanë dalë në rrugë për të kërkuar plotësimin e kërkesave të tyre.