Sonte ndodhi gjest i rrallë nga protesta. Një protestues u çon shishe me ujë efektivëve të forcave speciale dhe thotë se për t’i blerë shpenzoi aq para sa kishte në xhep. Të tjerë afrohen dhe u japin dorën policëve. Këto gjeste e nderojnë protestën dhe qytetarët që marrin pjesë në të.
Janë aty për të kundërshtuar, për të kërkuar llogari dhe për të ngritur zërin për shqetësimet e tyre. Megjithatë, gjejnë kujdes edhe për njeriun me uniformë që qëndron përballë. E kuptojnë lodhjen e tij, i ofrojnë ujë dhe i shtrëngojnë dorën. Kjo është pjekuri qytetare dhe meriton vlerësim publik.
Të ndash edhe paratë e pakta që ke në xhep për t’i dhënë ujë tjetrit është solidaritet që flet vetë. Në një çast tensioni, ai protestues zgjedh të bëjë një të mirë. Me atë veprim ndihmon edhe që situata të qetësohet, duke dhënë një shembull për të gjithë.
Këta protestues dëshmojnë se vendosmëria dhe njerëzia ecin bashkë. Mund të jesh i pakënaqur, të kërkosh ndryshim me këmbëngulje dhe njëkohësisht të respektosh tjetrin. Dora e shtrirë nuk ua dobëson kërkesat; ua bën zërin edhe më të denjë për t’u dëgjuar.
Një prej protestuesve, i maskuar, i është drejtuar një efektivi të policisë, duke i thënë se zemërimi i tyre nuk është ndaj uniformave blu, por ndaj kryeministrit Edi Rama.
“Duam t’ju themi vetëm që nuk e kemi me ju. Na i bëni hallall për çdo gur. Çdo gur ndaj jush është ndaj Edi Ramës. As nuk ju njohim, as nuk e dimë se kush jeni. Ju kemi të gjithëve miq e shokë”, është shprehur protestuesi.
Ndërkohë, një tjetër protestues është parë duke komunikuar me një efektiv, të cilit i është drejtuar me këshillën që të heqë uniformën.
“Nëse e hiqni uniformën, do bëni më mirë. Mendimi im, ju bëni si të doni. Ju respektojmë”.
Prandaj, këta qytetarë meritojnë respekt, por edhe vëmendje ndaj shqetësimeve që i kanë nxjerrë në shesh. Institucionet kanë përgjegjësi t’i dëgjojnë dhe policia t’u përgjigjet me të njëjtën frymë respekti.
Sonte, protestuesit që ofruan ujë dhe dhanë dorën treguan një forcë të çmuar: aftësinë për të kërkuar të drejtat e tyre duke ruajtur njerëzinë.
