Arqipeshkëvi i Shkodrës, Giovanni Peragine, ka reaguar për protestat që po zhvillohen në vend, duke kërkuar nga autoritetet të dëgjojnë qytetarët dhe të marrin vendime konkrete për t’iu përgjigjur pakënaqësive të tyre. Në mesazhin e dhënë në vigjilje të festës së Zojës së Shkodrës, Peragine theksoi se protestat paqësore pasqyrojnë një pakënaqësi të thellë shoqërore, që nuk mund të shpërfillet.
“Përgjegjësia e autoriteteve nuk matet me deklarata, por me vendime konkrete”, u shpreh ai, duke shtuar se qeveria duhet të veprojë pa vonesë dhe të marrë edhe vendime të vështira kur këtë e kërkon e mira e vendit. Arqipeshkëvi dënoi gjithashtu dhunën, por nënvizoi se institucionet kanë detyrimin të hapin rrugë për dialog dhe të trajtojnë shkaqet e pakënaqësisë qytetare.
Ai theksoi se deri tani kemi venë re se përfitojnë vetëm disa, kurse shumica ka probleme serioze jetese.
Në mesazhin e tij, Peragine u ndal edhe te qyteti i Shkodrës, duke theksuar se ai u përket të gjithë qytetarëve, jo vetëm institucioneve apo banorëve të qendrës. “Shkodra u përket të gjithë qytetarëve të saj dhe nuk duhet të jetë pronë e askujt”, deklaroi ai. Sipas arqipeshkëvit, zhvillimi i qytetit kërkon përgjegjësi të përbashkët, solidaritet dhe angazhim nga çdo qytetar, pasi një shoqëri më e drejtë ndërtohet përmes respektit dhe bashkëpunimit të përditshëm.