Aktorja indiane Sara Khan, e cila fitoi zemrat e publikut shqiptar me rolin e Sadnës në serialin e njohur Bidaai, ka ndarë një mesazh në mbështetje të shqiptarëve, duke shprehur shqetësimin e saj për situatën dhe protestat në vend.
Përmes një postimi në Instagram, aktorja ka rikujtuar lidhjen e veçantë që ka krijuar ndër vite me publikun shqiptar, i cili e mirëpriti dhe e mbështeti që në kohën kur seriali transmetohej në ekranet tona. Sara ka theksuar se dashuria që ka marrë nga shqiptarët ka mbetur e veçantë për të, pavarësisht largësisë dhe ndryshimeve gjuhësore.
Këtë herë, megjithatë, mesazhi i saj ka qenë i mbushur me shqetësim për të rinjtë shqiptarë, shpresat e tyre dhe familjet që jetojnë me frikën për sigurinë e të afërmve. Aktorja ka nënvizuar se çdo i ri meriton të dëgjohet, të trajtohet me dinjitet dhe të ketë mundësi të ndërtojë të ardhmen në vendin e tij. Përmes këtyre fjalëve, ajo ka shprehur mbështetjen e saj për të gjithë ata që po përjetojnë pasiguri dhe vështirësi në këto ditë.
Postimi i plotë
Të dashurit e mi shqiptarë,
Ju më pritët në shtëpitë tuaja si Sadhna dhe më dhuruat aq shumë dashuri, pavarësisht gjuhës dhe largësisë, të cilat nuk kanë qenë kurrë pengesë mes nesh. Këtë dashuri e kam mbajtur gjithmonë në zemrën time.
Sot, zemra ime është e rënduar kur mendoj për ju, veçanërisht për të rinjtë tuaj, për shpresat dhe ëndrrat e tyre, si dhe për familjet që presin me ankth që ata të kthehen shëndoshë e mirë në shtëpi.
Është thellësisht e dhimbshme që zemrat e reja duhet të përballen me kaq shumë frikë, kur përpara duhet të kenë kaq shumë arsye për të shpresuar. Çdo i ri meriton të dëgjohet, të trajtohet me dhembshuri dhe dinjitet, si dhe të besojë se në vendin e tij ka një vend për ëndrrat dhe aspiratat e tij.
Do të doja që këto fjalë të mund t’u sillnin sadopak ngushëllim të gjithë atyre që po vuajnë. Çdo prindi të shqetësuar, çdo të riu të frikësuar dhe kujtdo që po përballet në heshtje me dhimbjen e vet: ju kam në mendimet dhe lutjet e mia.
Ju bëtë që dikush, edhe pse larg jush, të ndihej si një nga tuajt. Ju lutem, dijeni se dhimbja juaj nuk më duket aspak e largët.
Me shumë dashuri dhe me një lutje të heshtur për ditë më të qeta e më të buta,
Sadhna juaj.