Kryetarja e Kuvendit të Kosovës, Albulena Haxhiu, ka reaguar lidhur me protestat në Tiranë, duke kërkuar nga institucionet shqiptare që t’i trajtojnë me seriozitet kërkesat e protestuesve dhe të shmangin qëndrimet arrogante. “Shqipëria për ne është shtëpi”, u shpreh ajo, duke vlerësuar se institucionet shtetërore duhet të dëgjojnë zërin e qytetarëve dhe të reflektojnë ndaj kërkesave të tyre.
Haxhiu iu drejtua veçanërisht Kuvendit, qeverisë dhe Presidencës në Shqipëri, duke theksuar se ato kanë përgjegjësi për të shqyrtuar kërkesat e studentëve, pavarësisht nëse bëhet fjalë për shqetësime të shfaqura së fundmi apo për probleme të akumuluara ndër vite. “Është shumë e rëndësishme që kërkesat e protestuesve të dëgjohen nga institucionet”, deklaroi ajo.
Duke komentuar përplasjet gjatë protestave, kryetarja e Kuvendit të Kosovës u shpreh kundër përdorimit të dhunës, duke kërkuar që ajo të marrë fund nga të dyja palët. Ajo gjithashtu paralajmëroi se një qasje arrogante nga ana e institucioneve mund të përshkallëzojë më tej situatën. “Mendoj që arroganca vetëm nxit protestat”, tha Haxhiu, duke bërë thirrje për maturi, seriozitet dhe tejkalim të dallimeve përmes dialogut. Mohon përfshirjen e VV-së në organizimin e protestave
Haxhiu foli edhe për raportimet mbi pjesëmarrjen e mbështetësve të Lëvizjes Vetëvendosje në protestat në Tiranë, duke mohuar se partia ka bërë thirrje për përfshirjen e tyre në manifestime. “Të theksoj që asnjëherë nuk ka pasur thirrje nga VV që të mbështeten protestat”, deklaroi ajo. Sipas Haxhiut, Vetëvendosje ka mbështetje të gjerë qytetare dhe nuk mund të mbajë përgjegjësi për vendimet individuale të mbështetësve të saj për të marrë pjesë në protesta.