Emigracioni përçan liderët e BE-së në samitin e Brukselit

Udhëheqësit e Bashkimit Europian u përplasën për çështjen e emigracionit të paligjshëm në orët e fundit të samitit dyditor në Bruksel, duke i zgjatur diskutimet përtej orarit të parashikuar.

Danimarka, Polonia dhe Italia kërkuan ndryshime në konkluzionet përfundimtare të samitit, përfshirë një referencë të tërthortë ndaj planit të Spanjës për legalizimin në shkallë të gjerë të 600 mijë emigrantëve pa dokumente.

Një draft i ri i dokumentit përfundimtar të samitit, u bën thirrje vendeve anëtare të shmangin “masat që mund të nxisin emigracionin e paligjshëm”.

Dokumenti kërkon gjithashtu që Komisioni Europian të forcojë koordinimin e politikave kombëtare të emigracionit që mund të ndikojnë te shtetet e tjera anëtare. Kjo është një tjetër kërkesë e përbashkët e tri vendeve, e cila interpretohet si kritikë ndaj qeverisë së majtë në Madrid.

Drejtuesit e Maltës, Letonisë, Irlandës, Gjermanisë dhe Lituanisë u larguan nga samiti, ndërsa ndërtesën e kishte lënë edhe shefja e diplomacisë europiane, Kaja Kallas.

Është e pazakontë që mbledhjet e Këshillit Europian të zgjasin kaq shumë gjatë ditës së dytë, çka dëshmon për mosmarrëveshjet mes vendeve anëtare, veçanërisht për politikat e emigracionit.

Mbështetja për Ukrainën ishte një tjetër çështje kryesore e samitit.

Presidenti ukrainas, Volodymyr Zelenskyy, u kërkoi të premten udhëheqësve të BE-së të sigurojnë 70 miliardë euro mbështetje shtesë financiare dhe ushtarake gjatë vitit të ardhshëm.

Kërkesa vjen në një moment kur Bashkimi Europian po përballet me rritjen e borxhit dhe të kostove të huamarrjes, duke e bërë më të vështirë sigurimin e fondeve të reja.

Zelenskyy deklaroi se Ukraina do të vazhdojë të qëndrojë e vendosur, ndërkohë që presidenti amerikan Donald Trump po arrin marrëveshje me homologun rus, Vladimir Putin, duke dobësuar qëndrimin e përbashkët të aleancës transatlantike.

“Unë mbroj vetëm interesat e Ukrainës dhe të popullit ukrainas. Ne u sulmuam, u pushtuam dhe njerëzit tanë u vranë. Është plotësisht logjike që kemi të drejtën të mbrohemi”, deklaroi Zelenskyy gjatë konferencës për shtyp, duke iu përgjigjur një pyetjeje të Euronews.

Ai theksoi se, pavarësisht përpjekjeve të Rusisë për të kufizuar të drejtat e Ukrainës, vendi i tij ka të drejtën të mbrojë veten.

Deklaratat vijnë në një kohë kur Trump ka ashpërsuar kritikat ndaj Kievit, duke i cilësuar sulmet ukrainase ndaj rafinerive ruse të naftës si një “turp” dhe duke kërkuar zhvillimin e zgjedhjeve të reja në Ukrainë.

“E konsideroj Zelenskyyn më të vështirë për t’u trajtuar sesa Putinin”, deklaroi Trump për Newsmax. / Euronews