Ish-deputetja e PD, Rudina Hajdari ka reaguar lidhur me protestat studentore, duke u bërë thirrje protestuesve të pranojnë ftesën e kryeministrit Edi Rama për dialog, por duke kërkuar që procesi të zhvillohet në mënyrë transparente dhe jo me dyer të mbyllura. Ajo ka publikuar një fotografi të të atit, Azem Hajdarit, së bashku me të rinj të tjerë, gjatë një takimi me Ramiz Alinë në dhjetor të vitit 1990.
Duke iu referuar këtij momenti historik, Hajdari thekson se përballja përmes dialogut nuk duhet përjashtuar, ndërsa shprehet se do të ishte e para që do të ulej përballë kryeministrit për të diskutuar kërkesat e protestuesve. “Uluni në dialog, por me transparencë, jo pas dyerve të mbyllura. Mos i humbni këto mundësi!”, shkruan ajo.
Hajdari vlerëson se protestuesit kanë argumente të mjaftueshme për të mbrojtur qëndrimet e tyre dhe për të kërkuar përmbushjen e kërkesave. “Unë do të ulesha e para në ato karrige dhe do të përballesha drejtpërdrejt me Ramën. Ai nuk ka si të mbrohet përballë argumenteve tuaja. I keni të gjitha argumentet për të arritur maksimumin e kërkesave tuaja”, shprehet ajo.
Në reagimin e saj, Hajdari sjell në vëmendje edhe figurën e të atit, Azem Hajdarit, duke e përdorur takimin e tij me Ramiz Alinë si shembull të përballjes politike përmes dialogut. Në përfundim, Hajdari paralajmëron se refuzimi i dialogut mund t’u lërë hapësirë aktorëve të tjerë të negociojnë në emër të protestuesve, ndërsa kritikon ata që, sipas saj, shfaqin publikisht solidaritet, por ndjekin interesa personale. “Nëse nuk uleni ju, dikush tjetër do ta bëjë dialogun në kurrizin tuaj. Shumica fërkojnë duart natën për një llokmë dhe bëjnë sikur u qan zemra ditën”, përfundon Hajdari.
