Kreu i grupit parlamentar të Partisë Demokratike, Gazment Bardhi, thotë se kryeministri Edi Rama ka standarde të dyfishta në trajtimin e zyrtarëve të qeverisë dhe qytetarëve që protestojnë. Bardhi shprehet se në vend që të përballet me kërkesat e të rinjve, mazhoranca zgjedh baltosjen dhe shpifjen ndaj kundërshtarëve. Për të nëse Rama do të kishte verifikuar të kaluarën dhe integritetin e zëvendëskryeministrave, ministrave, deputetëve, kryebashkiakëve dhe drejtorëve të tij, Shqipëria nuk do të ishte në gjendjen aktuale.
Postimi i plotë
Kur nuk ke përgjigje për kërkesat e rinisë, rruga më e lehtë është baltosja dhe shpifja! Por faktet flasin vetë!
Po të ishte kujdesur Edi Rama të verifikonte të kaluarën dhe integritetin e zëvendëskryeministrave, ministrave, deputetëve, kryetarëve të bashkive dhe drejtorëve të tij, Shqipëria nuk do të ishte katandisur në këtë gjendje.
Por, për të ruajtur pushtetin, ai ka dëshmuar se është i gatshëm të ngrejë në majat e qeverisjes individë të lidhur me krimin e organizuar. Ndërsa, për të goditur këdo që e konsideron kërcënim për pushtetin e tij, është i gatshëm të përdorë çdo mjet, deri në përpjekjet për të kriminalizuar kundërshtarët dhe qytetarët shqiptarë.
Për Belinda Ballukun, Erion Veliajn, Mirlinda Kaçanajn, Vlora Hysenin apo Ergys Agasin, etj., na këshillon të mos flasim dhe t’i prezumojmë të pafajshëm, ndërsa qytetarët që protestojnë kërkon t’i shpallim fajtorë pa prova dhe pa një vendim gjykate.
Për Edi Ramën, pushteti duket se ka qenë gjithmonë më i rëndësishëm se integriteti, përgjegjësia dhe interesi i qytetarëve. Pikërisht kjo është një nga arsyet pse Shqipëria ndodhet sot në këtë gjendje.