Kryeministri shqiptar, Edi Rama, ka njoftuar se këtë javë do të publikohet një ligj i ri që parashikon gjoba prej më shumë se 550 dollarësh për “këdo që zgjedh të qëndrojë në një turmë” që kryen akte dhune, plaçkitjeje në hapësira publike, apo “fsheh identitetin”. Në një fjalim në rrjetet sociale, Rama theksoi se masat shtrënguese do të zbatohen për çdo lloj tubimi “kur ai rezulton në dëmtim prone”. Ky njoftim vjen pas muajsh demonstratash antiqeveritare, të cilat ditët e fundit janë përshkallëzuar në beteja mes forcave të sigurisë dhe protestuesve.
Ligji i ri do t’i japë policisë kompetenca për të kufizuar “tubimet” në raste të caktuara, nëse ekziston rreziku i dhunës. Rama deklaroi se “kushdo që kërkon dorëheqjen time gabon nëse mendon se ajo mund të detyrohet apo imponohet në çfarëdo mënyre, por nuk besoj se gjithçka që ata thonë dhe kërkojnë është e gabuar”. Kjo deklaratë erdhi ndërsa disa qindra persona në kryeqytet zhvilluan një protestë të re jashtë zyrave të tij.
Lideri i opozitës dhe rivali i ashpër i Ramës, Sali Berisha, kreu i Partisë Demokratike, tha se qytetarët nuk do t’i pranojnë masat e reja qeveritare. Përmes një komunikate, partia e tij theksoi se “do të qëndrojmë fort kundër tyre” dhe “do t’i përgjigjemi dhëmb për dhëmb” Ramës “për t’i dhënë atë që meriton”, siç u shpreh Berisha në një shkëmbim online me publikun.
Ligji i ri parashikon gjithashtu kompensim për kompanitë e vogla të prekura nga protestat dhe veprime kundër atyre që “inkurajojnë, organizojnë ose koordinojnë pjesëmarrjen e fëmijëve të mitur të shkollave në tubime”. Mësuesit kanë mbështetur nxënësit e shkollave të mesme që kanë marrë pjesë në protesta këtë vit. Pas protestave të së shtunës, policia njoftoi se 23 persona ishin arrestuar, 13 të tjerë përballen me procedime ligjore dhe 30 persona ishin “në kërkim”.
Marrë nga France 24 Live News