Një ngjarje e rëndë ka tronditur Pejën, ku 49-vjeçarja Arlinda Sylaj Zekaj dyshohet se është vrarë me sëpatë nga kunati i saj, Albert Sylaj, në Vitomiricë. Bashkëshorti i viktimës, Jeton Sylaj, është ndaluar për 48 orë pas marrjes në pyetje nga policia.
Pas kësaj ngjarjeje të rëndë, dalin në dritë detaje shqetësuese nga historia e Arlindës, e cila, sipas mediave në Kosovë, kishte përjetuar dhunë në familje dhe prej kohësh po përpiqej të bashkohej me djalin e saj.
Arlinda dhe bashkëshorti kishin jetuar për rreth dhjetë vjet në Shtetet e Bashkuara të Amerikës. Familja ishte me origjinë nga Deçani, ndërsa më pas ishte vendosur në Vitomiricë të Pejës.
Sipas raportimeve të “Sinjalit”, pas kthimit në Kosovë, marrëdhëniet mes bashkëshortëve ishin përkeqësuar, ndërsa Arlinda dyshohet se ishte përballur me dhunë të vazhdueshme. Bashkëshorti e kishte dëbuar nga shtëpia, i kishte djegur rrobat dhe më pas ishte ndarë prej saj.
Pas ndarjes, 49-vjeçarja ishte përballur edhe me vështirësi për të marrë pranë vetes djalin e saj. Në një periudhë kur bashkëshorti kishte udhëtuar drejt Shteteve të Bashkuara, fëmija kishte mbetur nën përkujdesjen e një personi të tretë, ndërsa nëna kishte kërkuar ndërhyrjen e institucioneve për zgjidhjen e situatës.
Kërkesat e saj lidhen edhe me pretendimin se fëmija kishte mbetur pa përkujdesjen e prindit që ishte larguar jashtë vendit. Për Arlindën, pamundësia për të pasur djalin pranë nuk ishte thjesht një mosmarrëveshje familjare, por, sipas pretendimeve, një formë e rëndë e dhunës psikologjike.
Në këtë histori përmendet edhe një urdhër mbrojtës, i lidhur me dhunën e raportuar nga bashkëshorti. Megjithatë, mbeten për t’u sqaruar përmbajtja dhe kohëzgjatja e urdhrit, mënyra e zbatimit të tij, si dhe vendimet e marra për përkujdesjen ndaj fëmijës.
Sipas raportimeve në mediat kosovare, për një urdhër ishte pritur rreth 24 ditë, ndërsa një kërkesë tjetër pretendohet se ishte refuzuar. Ende nuk është bërë e qartë se për cilin vendim konkret bëhet fjalë, cili institucion e kishte shqyrtuar kërkesën dhe mbi çfarë arsyetimi ishte marrë vendimi.
Por një prej elementeve më shqetësuese është se vetëm tri ditë para vrasjes, Arlinda kishte kërkuar urgjentisht ndërhyrjen e Prokurorisë Themelore në Pejë.
Në një letër të pranuar më 22 tetor 2026 dhe drejtuar kryeprokurores, 49-vjeçarja kërkonte marrjen e masave ndaj zyrtarëve që, sipas saj, kishin dështuar në përmbushjen e detyrave, si dhe ekzekutimin e menjëhershëm të një urdhri gjyqësor.
Në dokument, ajo shkruante se rreziku për jetën e saj vazhdonte dhe kërkonte hetime ndaj zyrtarëve të përfshirë, duke nisur nga ata të Qendrës për Punë Sociale.
“Kjo është shtesa ime e fundit”, kishte shkruar Arlinda në letrën e saj.
Në të njëjtin dokument, ajo kishte paralajmëruar se mund të vinte dita kur institucionet do të detyroheshin të jepnin llogari vetëm pasi t’i merrej jeta.
Vetëm tri ditë më vonë, ajo u gjet e vrarë.
Mbrëmjen e 25 tetorit, Arlinda ishte marrë në pyetje nga policia në Pejë lidhur me një rast të dhunës në familje. Rreth orës 20:58, ajo ishte kthyer në banesë e shoqëruar nga patrulla policore.
Sipas raportimeve, rreth dhjetë minuta pasi zyrtarët policorë ishin larguar, 49-vjeçarja u gjet pa shenja jete në dhomën e gjumit.
Rrethanat e plota të vrasjes, përgjegjësitë e personave të përfshirë dhe mënyra se si janë trajtuar më herët kërkesat e Arlindës ndaj institucioneve mbeten për t’u sqaruar nga hetimet.a.b
