Arsenali përballet me një kërcënim serioz nga Gjermania në lidhje me të ardhmen e kapitenit Martin Odegaard. Në një kohë kur klubi londinez po negocion rinovimin e kontratës me mesfushorin norvegjez, në skenë ka dalë Bayern Munich, i cili ka shfaqur interes për të siguruar shërbimet e tij.
Sipas raportimit të “Sky Sport Deutschland”, drejtuesit e klubit bavarez e vlerësojnë prej kohësh 27-vjeçarin dhe kanë ruajtur kontakte të vazhdueshme me përfaqësuesit e tij. Madje, Odegaard nuk do të ishte indiferent ndaj interesimit të Bayern-it, pasi, pavarësisht se ndihet mirë te Arsenali, mund ta imagjinojë veten në të ardhmen me fanellën e gjigantëve gjermanë.
Kontrata aktuale e kapitenit të “Topçinjve” është e vlefshme deri në vitin 2028, por drejtuesit e klubit anglez nuk duan të rrezikojnë të ardhmen e tij. Synimi është që palët të arrijnë një marrëveshje të re afatgjatë, përpara se situata kontraktuale të bëhet më e ndërlikuar.
Në fakt, skenari më i mundshëm mbetet rinovimi, duke qenë se Odegaard është një nga figurat kryesore të skuadrës së drejtuar nga Mikel Arteta.
Megjithatë, interesimi i Bayern Munich ka shtuar shqetësimin në Londër. Marrëdhëniet e mira mes drejtuesve bavarezë dhe përfaqësuesve të futbollistit mund t’i japin një avantazh klubit gjerman.