E gjithë vëmendja e tifozëve italianë do të jetë nesër mbrëma në stadiumin “San Siro”, ku Milan dhe Inter do të përballen në një tjetër kapitull të rivalitetit të tyre historik, në atë që njihet si Derbi i Madoninës.
Përballja mes dy gjigantëve të futbollit italian pritet të dhurojë emocione të mëdha, ndërsa historia e derbit dëshmon rivalitetin e fortë që ka shoqëruar ndër vite dy skuadrat e Milanos.
Ndeshja e radhës do të jetë përballja e 247-të zyrtare mes tyre. Në bilancin e përgjithshëm, Interi ka një avantazh të lehtë, me 91 fitore, kundrejt 84 triumfeve të Milanit, ndërsa 71 takime janë mbyllur në barazim.
Edhe në aspektin e golave, zikaltërit kanë shënuar më shumë. Interi numëron 341 gola në përballjet zyrtare ndaj rivalëve të qytetit, ndërsa Milani ka realizuar 324 gola.
Dy skuadrat janë përballur në kompeticione të ndryshme, përfshirë Serie A, Kupën e Italisë, Champions League dhe Superkupën e Italisë. Një prej rekordeve më të veçanta i përket Interit, që regjistroi gjashtë fitore radhazi në derbi gjatë periudhës 2023-2024.
Megjithatë, Milani ka arsye për të besuar te një tjetër rezultat pozitiv. Kuqezinjtë kanë fituar dy përballjet e fundit në Serie A kundër rivalëve zikaltër, të dyja me rezultatin 1-0, në nëntor 2025 dhe mars 2026.