Protestat kundër rritjes së kostos së jetesës kanë përfshirë disa vende evropiane, duke u shoqëruar me përplasje mes demonstruesve dhe policisë. Në Gjermani, mijëra qytetarë dolën në rrugë për të kundërshtuar shtrenjtimin e jetesës, shkurtimet e shpenzimeve publike dhe shërbimin e detyrueshëm ushtarak. Ajo që nisi si një demonstratë kryesisht paqësore përfundoi me incidente të dhunshme, plaçkitje dyqanesh dhe dëmtim të pronës.
Ngjarjet më të rënda u regjistruan në Frankfurt, ndërsa tensione pati edhe në Berlin, Këln dhe Hamburg. Protestuesit sulmuan policinë dhe shërbimet e emergjencës me gurë, shishe dhe fishekzjarrë, duke detyruar autoritetet të përdorin autobotët me ujë për shpërndarjen e turmës. Në Frankfurt u thyen vitrinat e disa bizneseve, përfshirë edhe një dyqan armësh, ndërsa policia kreu arrestime dhe sekuestroi dy armë.
Demonstratat u organizuan nga grupimi aktivist Gen Z regelt, i cili kërkon më shumë financime për arsimin dhe shëndetësinë, si dhe një shpërndarje më të drejtë të barrës ekonomike.
Ndërkohë, protesta masive u zhvilluan edhe në Francë, ku mbi 320 mijë persona dolën në rrugë. Në disa qytete pati përplasje me policinë, përdorim të gazit lotsjellës dhe mbi 500 arrestime.
Tensione u shënuan gjithashtu në Itali, në Romë dhe Torino, si dhe në Portugali, ku qytetarët kundërshtuan një projektligj për qiratë.
Gjatë javëve të fundit, lëvizjet protestuese të të rinjve janë shtrirë në disa shtete, përfshirë Belgjikën, Irlandën, Spanjën, Greqinë, Serbinë dhe Shqipërinë. Pavarësisht ndryshimeve në kërkesa, shqetësimet kryesore lidhen me krizën ekonomike, rritjen e çmimeve, vështirësitë për strehim, arsimin dhe mungesën e perspektivës për brezin e ri.