Besimi në ekonomi rritet lehtë në tetor, ndërtimi dhe tregtia shënojnë rënie

Besimi në ekonomi shënoi një rritje të lehtë gjatë tetorit, i mbështetur nga përmirësimi i aktivitetit në industri dhe shërbime, ndërsa ndërtimi dhe tregtia regjistruan rënie të ndjeshme të besimit. Sipas vrojtimit të publikuar më 2 nëntor nga Banka e Shqipërisë, Treguesi i Ndjesisë Ekonomike (TNE) u rrit me 0.4 pikë krahasuar me shtatorin, duke qëndruar 8 pikë mbi mesataren historike. Rënia më e fortë u regjistrua në sektorin e ndërtimit, ku treguesi i besimit humbi 5.7 pikë përqindje gjatë tetorit. Sipas Bankës së Shqipërisë, përkeqësimi u përcaktua kryesisht nga vlerësimet më të ulëta të bizneseve për kontratat porositëse, ndërsa edhe aktiviteti ndërtues dha kontribut negativ.

Balanca e kontratave porositëse zbriti në -24.9 pikë përqindje, nga -15 pikë në shtator. Megjithatë, besimi në ndërtim vijon të qëndrojë 11.5 pikë përqindje mbi mesataren historike. Dobësim u regjistrua edhe në tregti, ku treguesi i besimit ra me 3.5 pikë përqindje. Bizneset raportuan vlerësime më pak optimiste për shitjet aktuale dhe ulje të pritjeve për punësimin. Balanca e vlerësimeve për ecurinë e shitjeve zbriti në 13.8 pikë përqindje, nga 18.3 pikë në shtator, ndërsa pritjet për porositë e ardhshme ranë në 12.3 pikë, nga 17.7 pikë një muaj më parë.

Në të kundërt, industria regjistroi përmirësim të besimit me 2.5 pikë përqindje, duke ndërprerë prirjen rënëse të tre muajve të mëparshëm. Rritja u mbështet kryesisht nga vlerësimet më pozitive të bizneseve për prodhimin aktual. Nderkohe, porositë nga eksportet vijuan të dobësohen. Balanca e tyre zbriti në -21.3 pikë përqindje, nga -16.8 pikë në shtator, ndërsa pritjet për prodhimin në muajt e ardhshëm ranë në 22.1 pikë, nga 31 pikë.

Shërbimet shënuan përmirësimin më të madh të besimit, me një rritje prej 3.2 pikësh përqindjeje. Bizneset vlerësuan më pozitivisht kërkesën dhe aktivitetin aktual, ndërsa treguesi i besimit qëndroi 8.3 pikë përqindje mbi mesataren historike. Edhe besimi konsumator u rrit me 1.1 pikë përqindje, i mbështetur nga përmirësimi i vlerësimeve për blerjet e mëdha dhe i pritjeve për gjendjen financiare personale. Balanca e vlerësimeve për blerjet e mëdha aktuale u përmirësua në -53.2 pikë përqindje, nga -55.5 pikë në shtator. Konsumatorët shprehën gjithashtu pritje më pozitive për gjendjen e përgjithshme të ekonomisë. Sipas vrojtimit, pritjet e bizneseve për çmimet shënuan rënie në të katër sektorët e ekonomisë. Edhe pritjet e konsumatorëve për çmimet vijuan të ulen gjatë tetorit.