Ndeshja kundër Atletico-s, Olise stërvitet me Bayernit! Diaz dhe Musiala në listën e gjatë të lojtarëve të lënduar

Michael Olise do të udhëtojë me skuadrën e Bayern Munich për ndeshjen e së martës kundër Atletico Madrid në Ligën e Kampionëve, por Luis Diaz dhe Jamal Musiala janë midis disa lojtarëve që mbeten jashtë.

I nominuari për Topin e Artë, Olise, kërkoi të zëvendësohej pasi pësoi një dëmtim në fund të ndeshjes së barazimit 2-2 të Bayernit me Borussia Dortmund të shtunën. Edhe mesfushori Ismael Saibari dhe sulmuesi Serge Gnabry u lënduan më rëndë.

Olise u stërvit të hënën me një fashë në gjurin e djathtë.

“Është mirë që ai po udhëton me ne, sepse është një lojtar i shkëlqyer që është gjithmonë një aset i madh. Megjithatë, do të shmangim rrezikun që kjo të shndërrohet në një dëmtim afatgjatë”, tha anëtari i bordit sportiv të Bayernit, Max Eberl.

Olise është në listën e skuadrës së Bayernit për ndeshjen dhe portieri Manuel Neuer gjithashtu udhëton pasi mungoi katër ndeshje për shkak të një dëmtimi në këmbë.

Diaz dhe Musiala u stërvitën individualisht ndërsa po rikuperohen nga dëmtimet muskulore, por asnjëri nuk u bë pjesë e skuadrës. Saibari është jashtë loje pas një operacioni në kyçin e këmbës dhe Gnabry mungon për shkak të një këputjeje në kofshë.

Ndihmëstrajneri Aaron Danks mbetet në krye të ekipit, ndërsa Bayern është pa trajnerin kryesor Vincent Kompany. Ai u lirua nga spitali javën e kaluar pas trajtimit për një infeksion pasi u rrëzua në stërvitje.

Bayerni ka pesë pikë nga tre ndeshje të Ligës së Kampionëve pas dy barazimeve radhazi dhe po kërkon fitoren e parë që nga shtatori.